DILI, 26 Marsu 2025 (TATOLI) – Konsellu Ministru autoriza Ministra Edukasaun, Dulce de Jesus Soares, hodi halo selebrasaun akordu kontribuisaun finanseira entre Timor-Leste no Ajénsia Kooperasaun Internasionál Koreia (KOICA, sigla inglés).
Kontribuisaun finanseira ne’ebé Governu Koreia liuhusi KOICA sei apoia ba Ministériu Edukasaun hamutuk millaun $6 ba dezenvolvimentu projetu For every child, Early Childhood care and Education (Ba labarik idaidak, kuidadu no Edukasaun iha primeira Infánsia).
Ministra Edukasaun hateten programa ne’e sei implementa durante tinan haat iha munisípiu Baukau no Bobonaru.
Nia esplika katak projetu ne’e ho objetivu atu fó apoiu ba labarik timoroan sira, husi idade tinan tolu to’o lima, hodi alkansa sira-nia potensiál tomak, liuhusi asesu ba programa dezenvolvimentu infantíl ho kualidade aas.
“Ita-nia númeru labarik ne’ebé partisipa ka hola parte iha Edukasaun Pré-eskolár iha munisípiu rua ne’e sei menus. Nune’e, KOICA haree presiza tebes fó apoiu ba munisípiu rua hodi hasa’e taxa partisipasaun kriansa ho idade hahú husi tinan tolu to’o lima, nune’e iha preparasaun di’ak antes tama ba Ensinu Báziku”, Dulce de Jesus Soares hateten iha Palásiu Governu, ohin.
Jornalista : Arminda Fonseca
Editora : Maria Auxiliadora
