DILI, 26 Marsu 2025 (TATOLI) – Ministru Asuntu Kombatente Libertasaun Nasionál (MAKLN), Gil da Costa Monteiro ‘Oan Soru’, aprezenta projetu dekretu-lei rua ba Konsellu Ministru no hetan ona aprovasaun.
Dekretu-lei rua ne’e mak ko’alia kona-ba alterasaun dahituk ba dekretu-lei númeru 15/2008, loron 04 fulan-Juñu, ne’ebé regula pensaun ba kombatente no mártir sira libertasaun nasionál nian, no alterasaun daruak ba dekretu-lei númeru 5/2012, loron 15 fulan-Fevereiru, ne’ebé regula Prestasaun Pekuniária Únika ba kombatente no família mártir libertasaun nasionál sira.
Tuir dokumentu husi Governu, alterasaun sira ne’ebé propoin ho objetivu atu garante armonizasaun rejime ne’e ho lei númeru 3/2024, loron 12 fulan-Juñu, ne’ebé halo alterasaun datoluk ba Estatutu Kombatente Libertasaun Nasionál, introdús medida hodi simplifika tramitasaun administrativa, klarifika rekizitu no prazu, no reforsa knaar Konsellu Munisipál sira hodi fó apoiu ba benefisiáriu sira.
Relembra katak, iha loron 09 Fevereiru 2022, Konsellu Ministru aprova projetu dekretu-lei, ne’ebé aprezenta husi Ministru Asuntu Kombatente Libertasaun Nasionál, Júlio Sarmento da Costa ‘Meta Mali’, ba alterasaun dahituk Dekretu-Lei númeru 15/2008, loron 04 Juñu, kona-ba pensaun kombatente no mártir libertasaun nasionál.
Projetu dekretu-lei ne’e ho objetivu atribui kompeténsia ba Administrasaun Konsellu Kombatente Libertasaun Nasionál hodi aprova regra movimentasaun konta bankária destinada ba depózitu retensaun pensaun kombatente no mártir libertasaun nasionál no ba administrasaun no prestasaun konta ba fundu ne’e rasik.
Alterasaun ne’e fó kobertura legál ba jestaun fundu veteranu, tanba iha tinan 2020 liubá veteranu sira hahú halo kontribuisaun, hodi rai osan iha mekanizmu ne’ebé hanaran fundu veteranu, ne’ebé ho montante besik ona millaun $20.
Notísia relevante: Governu aprova alterasaun pensaun kombatente mártir
Jornalista: Arminda Fonseca
Editora: Maria Auxiliadora
