DILI, 26 Marsu 2025 (TATOLI)—Diretór Jerál Servisu Korporativu iha Ministériu Saúde, Valentino Lisboa Marçal, hateten iha tinan ne’e Ministériu Saúde (MS) seidauk bele halo rekrutamentu ba pesoál saúde sira tanba daudaun ne’e sei halo hela koordenasaun ho Komisaun Funsaun Públika atu hadi’a enkuadramentu sira, liuliu haree ba saláriu pesoál saúde sira-ne’ebé mak servisu ho tinan naruk.
“Tinan ida-ne’e seidauk loke prosesu rekrutamentu, tanba sei halo preparasaun entre Ministériu Saúde ho Komisaun Funsaun Públika, hodi prodús enkuadramentu atu hadi’a saláriu ba pesoál saúde sira-ne’ebé mak permanente no loke fali vaga husi kontratu ba fali permanente. Hafoin ida-ne’e mak bele halo prosesu rekrutamentu foun,” Valentino Lisboa Marçal hateten iha nia kna’ar fatin, Kaikoli, kuarta ne’e.
Nia dehan, funsionáriu sira servisu permanente tiha ona, maibé saláriu sei nafatin de’it, hanesan sira-ne’ebé mak uluk aplika ho nível estudu SPK (Sekolah Perawat Kesehatan) ne’e ho saláriu $375, maibé agora ne’e sira bá hasai tiha ona diploma no balun médiku jerál maibé saláriu sei nafatin hela.
“Ho ida-ne’e hadi’a tiha lai hirak-ne’e, liuliu enkuadramentu sira-ne’e hotu, depois mak foin loke fali rekrutamentu. Se lae orsida, balun uluk SPK ne’ebé serbisu esperiénsia tinan naruk, depois ida foin tama sira-nia saláriu boot fali, ne’e problema,” nia esplika.
Kona-ba pesoál saúde sira-ne’ebé mak sei menus iha Postu Saúde no Sentru Saúde, nia hatán, parte Ministériu Saúde rekoñese duni, maibé daudaun sira atu kontratu kazuál sira atu koloka bá Postu Saúde sira-ne’ebé mak presiza.
“Ami rekoñese duni Postu Saúde balun sei presiza tan pesoál saúde. Kontratadu barak hela iha-ne’e. Hirak-ne’e sei koloka hotu fali bá Postu Saúde sira iha área remota sira-ne’ebé mak sei presiza,” Valentino informa.
Nia dehan, totál pesoál saúde sira-ne’ebé mak tama iha rezime espesiál kuaze hamutuk 4.616 husi territóriu laran tomak inklui Hospital Nacional Guido Valadares (HNGV).
Jornalista: Felicidade Ximenes
Editór: Xisto Freitas da Piedade
