DILI, 26 Marsu 2025 (TATOLI)—Diretór Jerál Servisu Korporativu iha Ministériu Saúde, Valentino Lisboa Marçal, hateten tempu badak Ministériu Saúde (MS) sei halo pagamentu ba profisionál saúde sira-ne’ebé halo servisu estra durante Novembru no Dezembru 2024.
“Novembru no Dezembru 2024 de’it mak ita seidauk halo pagamentu ba servisu estra. Ami-nia ekipa sei halo verifikasaun ba sira-nia dokumentu. La’ós ba pesoál saúde hotu-hotu, maibé ba sira-ne’ebé mak servisu iha oras estra nian,” Valentino dehan iha nia kna’ar fatin, Ministériu Saúde, Kaikoli, kuarta ne’e.
Nia hateten, bainhira Governu fó servisu ba pesoál saúde tenke identifika didi’ak, ezemplu iha-ne’ebá médiku karik na’in hira, enfermeiru karik na’in hira, entaun sé mak iha direitu atu hetan overtime ne’e tenke identifika didi’ak.
Valentino afirma, seluk mak Ministériu Saúde atu hadi’a saláriu no hadi’a subsídiu ba pesoál saúde sira iha área remota.
“Agora ida seluk mak ita atu la’o hodi hadi’a saláriu. La’ós ida-ne’e de’it maibé sei hadi’a mós subsídiu ba pesoál saúde sira iha área remota. Ema ne’ebé servisu barak liu, nia mak sei hetan direitu barak, entaun ida-ne’e ami halo ona diskusaun no sei iha prosesu nia laran, tanba desizaun atu foti ida-ne’e la’ós Ministériu Saúde más tenke iha liña koordenasaun ho Komisaun Funsaun Públika (KFP). Agora halo hela despaxu konjunta ida entre jurídiku husi Ministériu Saúde no mós jurídiku husi KFP hodi haree ba asuntu ida-ne’e,” nia haktuir.
Entretantu, pesoál saúde sira-ne’ebé mak iha Novembru no Dezembru tinan kotuk Ministériu Saúde seidauk halo pagamentu ne’e hamutuk 200-resin. Numéru ne’e mai husi munisípiu sira no ospitál referrál sira.
Jornalista: Felicidade Ximenes
Editór: Xisto Freitas da Piedade
