VIKEKE, 27 Marsu 2025 (TATOLI)—Abitante husi aldeia Abadere, suku Babubu, postu Uatulari, munisípiu Vikeke uma kain 30 konsume de’it udan-been, tanba seidauk asesu bee-moos no ba kuru bee iha bee-matan ne’e tenke la’o ain ho distánsia ne’ebé dook.
“Ami hela iha aldeia Abadere susar liu ba bee-moos. Kuandu udan, ami sente kmaan tanba ami bele tau jerigen sira iha uma nia tatis atu kolleta udan-been hodi komsume. Maibé, kuandu la udan, ami tenke la’o ain metru 50-resin mak foin to’o bee matan hodi kuru bee ba konsume no haris,” Abitante aldeia Abadere, Gaspar Pinto Amaral, hateten ba Agência Tatoli iha suku Babulu, ohin.
Gaspar relata, kona-ba fasilidade bee-moos ne’e Programa Dezenvolvimentu Nasionál Suku (PNDS) no Care Timor Leste instala ona iha aldeia Abadere, maibé distribuisaun bee mak lato’o iha fatin ne’e hodi komunidade asesu.
“Fasildade bee-moos nian agora daudaun iha hela ami-nia aldeia maibé distribuisaun bee mak ladun, tan ne’e mak agora daudaun ami la asesu bee-moos. Ami hakarak husu diresaun Agua Saneamentu no Ambiente koloka tékniku hodi kontrola bee-moos, atu nune’e ami bele konsume no uza bee ba nesesidade loro-loron,” nia dehan.
Tanba ne’e, nia dehan, presiza tékniku hodi kontrola no distribui bee ba komunidade tanba fasilidade iha maibé distribuisaun bee mak ladi’ak.
Hatán ba preokupasaun ne’e, diretór SMASA munisípiu Vikeke, Guilhermino Gomes Soares, hateten kona-ba bee rurál ne’e komunidade rasik mak jere fasilidade sira iha suku no aldeia, maibé durante ne’e grupu komunitária suku Babulu durante ladun ativu.
“Ho nune’e, ami foin lalais halo enkontru ho autoridade bo komunidade Babulu, hodi forma GMF hodi tau matan ba bee. Iha suku Babulu, ami mós distribui ona matadalan ba GMF hodi kontrola bee no fasilidade sira iha suku ne’e,” nia hateten.
Tuir dadus, totál populasaun iha suku Babulu hamutuk 2.718 ne’ebé kompostu husi mane na’in-1.323 no feto na’in-1.935 ho uma kain hamutuk 636. Suku Babulu ne’e iha aldeia ualu (8) maibé aldeia hitu asesu ona bee-moos no aldeia Abadere mak seidauk asesu.
Jornalista : Vitorino Lopes da Costa
Editór : Cancio Ximenes
