KOVALIMA, 27 Marsu 2025 ( TATOLI) – Servisu Munisipál Edukasaun Kovalima, Elda de Fatima, fó hanoin ba dirijente eskola labele envolve nia espoza iha implementasaun programa Merenda eskolár iha eskola sira.
Dirijente edukasaun fó hanoin relasiona nia simu informasaun katak diretór eskola no koordenadór EBF nia espoza balun te’in iha implementasaun Programa merenda eskolár iha munisípiu Kovalima.
“Ha’u husu favór, ho haraik aan di’ak liu bainhira hapara tiha ita-boot sira-nia espoza hodi fó oportunidade ba kbiit laek sira, ita-boot funsionáriu te’in tan kuitadu jere oinsá”, Elda de Fátima, haktuir ba jornalista sira iha Kovalima, ohin.
Ho nune’e bainhira dirijente eskola envolve nia espoza te’in iha implementasaun Programa merenda eskolár di’ak liu hapara hodi fó oportunidade ba ema seluk.
“Ha’u atu fó hanoin ba ita-boot diretór EBC no koordenadór EBF sira tuir informasaun katak funsionáriu no koordenadór nia espoza mós te’in iha implementasaun programa PME iha eskola balun”, nia dehan.
Hafoin simu informasaun dirijente edukasaun ne’e fó atensaun ba dirijente eskola sira atu hapara hodi fó oportunidade ba ema seluk molok ekipa fiskalizasaun ho inspetór sira ba terenu halo fiskalizasaun.
Iha sorin seluk, Prezidente Autoridade Munisípiu Kovalima, Miguel Armada Cardoso, informa, autoridade foin simu informasaun verbál husi dirijente sira nune’e seidauk bele pronunsia buat ruma.
Tanba diretora ko’alia verbál de’it funsionáriu no koordenadór balun nia espoza te’in iha Programa merenda eskolár, maibé ida-ne’e informasaun seidauk iha dadus konkretu autoridade labele ko’alia informasaun.
“Ita identifika informasaun referida ita halo prosesu tanba iha prosesu konkursu públiku la autoridade funsionáriu nia espoza atu te’in iha PME, ita seidauk iha informasaun ne’ebé serteza nune’e seidauk bele atu foti desizaun ruma”, nia esplika.
Jornalista:Celestina Teles
Editór: Rafael Ximenes de A. Belo
