DILI, 27 Marsu 2025 (TATOLI)–Ajénsia Kooperasaun Internasionál Japaun (JICA-sigla inglés) no Ministériu Saúde (MS), aprezenta dezeñu projetu rekualifikasaun Hospital Nacional Guido Valadares (HNGV) ba Ministériu Obra Públika (MOP).
“Orsamentu ne’e JICA mak oferese no konstrusaun JICA mak sei hala’o. Sei ramata iha tinan 2027. Ha’u seidauk lembra bainhira mak projetu konstrusaun ne’e hahú,” Diretora Jerál Unidade Jestaun Projetu Saúde, Adélia Maria Moniz Barreto, hateten ba TATOLI, iha nia kna’ar fatin, kinta ne’e.
Nia haktuir katak JICA no MS submete tiha ona espesifikasaun ba MOP iha semana kotuk hanesan publika husi JICA.
Tuir JICA nia publikasaun iha nia pájina ofisiál Facebook, projetu ne’e sei dura fulan 21 no konstrusaun sei hahú iha tinan ne’e nia klaran. Edifísiu foun ne’e sei garante atendimentu no efisiénsia ne’ebé di’akliu hosi médiku sira ba pasiente.
Publikasaun ne’ebé planeadu inklui mós planu konstrusaun ba edifísiu foun, ne’ebé tuir planu HNGV nian atubele atende pasiente sira.
Fó hanoin katak akordu subvensaun nian asina entre Ministra Finansa no reprezentante JICA nian iha loron 20 fulan-Agostu tinan 2024 hodi prevee maizumenus dolar millaun 20 ba konstrusaun edifísiu foun ne’ebé kompostu hosi departamentu maternidade, obstétriku, jinekolojia no ekipamentu médiku.
Jornalista: Felicidade Ximenes
Editór: Xisto Freitas da Piedade
