VIKEKE, 27 Marsu 2025 (TATOLI)—Ministru Administrasaun Estatál (MAE), Tomas do Rosário Cabral, kinta ne’e, inagura rezidénsia, morru no jardín hodi oferese ba Prezidente Autoridade Munisípiu Vikeke uza ba atendementu povu Vikeke.
Ministru Tomas do Rosário Cabral hateten, rezidénzia PAM Vikeke nian ne’ebé reabilita iha tinan kotuk, agora obra ne’e finaliza ona hodi sai sentru ba povu Vikeke tomak no halo atendementu ba bainaka sira seluk.
“Ohin, ita halo ona inaugurasaun rezidénsia ida-ne’e. Ba oin, PAM sei mai hela iha ne’e hodi simu ita-nia populasaun sira no inklui bainaka husi munisípiu seluk. Se uza rezidénsia privadu ema sei la ba vizita. Tan ne’e, fatin ida-ne’e sai konsentrasaun hodi halo koordenasaun buat ruma, fatin mak ida-ne’e,” Tomas do Rosário Cabral hateten iha serimónia inaugurasaun rezidénsia PAM iha Mersida, ohin.
Governante ne’e afirma, rezidénsia ida-ne’e reabilita ona maibé problema seluk mak laiha orsamentu ruma ba manutensaun, tanba ne’e fó atensaun ba diretór no autoridade sira presiza prevee mós orsamentu manutensaun ruma, atu buat ruma aa, karik bele uza hodi halo manutensaun lais.
Prezidente Autoridade Munisipál Viqueque, Francisco Cruz S. de Gonzaga Soares, hato’o agradesementu ba MAE ho ninia komitiva ne’ebé dezloka mai munisípiu Vikeke hodi inaugura rezidénsia PAM Vikeke no ba empreza responsável ne’ebé finaliza obra ida-ne’e.
Entretantu, Empreza Peaceful Unipesoál, Lda, mak halo reabilitasaun ba rezidénsia PAM Viqueque no projetu reabilitasaun ne’e hahú implementa iha fulan-Jullu 2023 ho totál orsamentu hamutuk $470,225.91.
Inaugurasaun ba rezidénsia ne’e ramata kontinua fó bensaun ba rezidénsia ne’ebé hetan bensaun husi padre parokia postu Vikeke Vila.
Iha serimónia inaugurasaun ba rezidénsia PAM Vikeke ne’e partisipa husi autoridade lokál, diretór munisipál, funsionáriu Vikeke no estudante sira.
Jornalista : Vitorino Lopes da Costa
Editór : Cancio Ximenes
