BAUKAU, 27 Marsu 2025 (TATOLI)—Governu liuhosi Ministériu Obra Públika (MOP), kinta ne’e, hatuur fatuk dahuluk ba konstrusaun ponte iha Suku Samalari, Postu Administrativu Baguia, Munisípiu Baukau.
Ministru Obra Públika, Samuel Marçal, esplika prosesu implementasaun projetu konstrusaun ponte ne’e hala’o tarde tanba kompañia responsável husi estranjeiru presiza prepara aan liuliu destaka ekipamentu iha terrenu.
“Ha’u husu atu iha Baguia sai ezemplu ba munisípiu seluk. Bainhira projetu ida la’o di’ak presiza ita hotu-nia kolaborasaun,” Samuel hateten iha Sede Suku Samalari.
Governante ne’e hato’o ona ba responsável kompañia atu aselera prosesu konstrusaun ponte referida tuir durasaun kontratu ne’ebé definidu ona no karik iha estensaun másimu tinan-rua tenke ramata ona, nune’e bele junta hamutuk ho estrada diresaun Laga-Baguia ne’ebé sei iha faze reabilitasaun.
Samuel fó prioridade dezenvolvementu estrada no ponte tanba konsideradu Baguia iha poténsia ba agrikultura relasiona ho rai-bokur no komunidade badinas nune’e tenke aselera konetividade.
“Ita tenke halo estrada no ponte nune’e produtu sira-ne’e balun han, balun lori ba merkadu para bele selu oan sira bá eskola,” nia enkoraja.
Iha fatin hanesan, Prezidente Autoridade Munisipál (PAM) Baukau, Veneranda Lemos Martins, hateten ponte importante tanba sei halo konesaun entre aldeia bá suku, suku bá postu no postu bá munisípiu liuliu movimentu transporte nune’e futuru bele krexe ekonomia komunidade Postu Administrativu Baguia.
“Ponte ne’e sei fasilita ita-nia maluk agrikultór sira atu transporta produtu bá merkadu. Bainhira ponte no estrada ramata, ita-nia ekonomia sei sírkula iha postu,” Veneranda informa.
Eis deputada ne’e husu ba komunidade Baguia atu kontribui ba prosesu konstrusaun nune’e laiha impedementu no sei ramata tuir kontratu ne’ebé determinadu ona.
Entretantu, projetu konstrusaun ponte iha Suku Samalari responsabiliza husi Kompañia MCC20 Grup Corp, Ltd, ho númeru konkursu /009/MOP-2024, ne’ebé sei konstrui ho durasaun fulan-12 ho valór orsamentu hamutuk $4.025.624.71 no sei supervizaun husi MOP.
Jornalista: Natalino Belo
Editór: Xisto Freitas da Piedade
