KOVALIMA, 27 Marsu 2025 (TATOLI) –Prezidente Repúblika, José Ramos Horta dezafia Komisaun Anti Korupsaun KAK) no Prokuradór Jerál (PJR) atu haree no investiga prosesu konstrusaun postu saúde iha Suku Beiseuk, Postu administrativu Tilomar, Munisípiu Kovalima.
Ho la’o ain hodi observa direta kondisaun Postu saúde ne’e, Xefe Estadu dezafia KAK no PJR, tanba postu saúde konstrui no obra seidauk entrega maibé obra referida labele uza tanba kondisaun uma aliser nakfera.
“Konstrusaun ida-ne’e nein PJR, KAK lakohi halo investigasaun; krime grave, fraude kontra Estadu no komunidade. Ha’u ezije presiza atu mai haree”, Xefe Estadu dehan ba jornalista sira hafoin observa postu saúde iha Suku Beiseuk, Postu Tilomar, ohin.
Konstrusaun ba obra referida Estadu gasta osan, maibé labele uza nune’e presiza atu prevee fali orsamentu foun. Molok atu prevee orsamentu foun, tuir prezidente, presiza responsabiliza.
Konstrusaun obra ne’e labele uza, xefe Estadu fó hanoin ba Autoridade Kovalima atu hasai materiál sira atu transfere ona materiál sira iha postu saúde nune’e labele estraga materiál.
Tuir Horta, ho obra ida-ne’e halo komunidade sira sai vítima no labele hetan oportunidade atu asesu saúde tanba ne’e autoridade labele simu no hanesan insultu bo’ot ida.
Bazeia ba observasaun postu saúde ida-ne’e labele aproveita ona, tanba uluk la estuda rai ne’e nune’e halo konstrusaun arbiru nune’e laiha solusaun presiza prevee orsamentu foun.
Iha vizita no observasaun ne’e mós PR dúvida ho ema ne’ebé mak foti desizaun maibé rekoñese desizaun polítika hodi loke postu saúde tuir duni nesesidade no haree dezeñu di’ak duni.
“Ha’u la hatene se mak foti desizaun. Desizaun polítika loke postu saúde desizaun di’ak, haree nia dezeñu di’ak tuir nesesidade komunidade tanba molok konstrui obra la halo estudu nune’e rai monu”, nia dehan.
Administradór Postu administrativu Tilomar, Venancio Sarmento reforsa katak, Governu konstrui ona postu saúde no finaliza maibé komunidade la uza obra referida tanba mosu dezastre naturál estraga nune’e populasaun 3000-resin labele uza.
“Ha’u ho populasaun tomak husu tulun ba xefe Estadu atu haree ida-ne’e konstrui fali nune’e ami bele atu asesu saúde labele la’o ain kilometru haat atu asesu saúde iha Suku Lalaua, Postu Tilomar”, nia husu.
Fó hanoin fali katak, Postu saúde Beisauk konstrui husi empreza Carame Unipesoál Lda ne’ebé hahú konstrui iha 18-8-2021 finaliza iha 17 Fevereiru 2022 maibé to’o ohin loron la entrega ne’ebé ho totál orsamentu $ 295.785.42.
Jornalista: Celestina Teles
Editór: Rafael Ximenes de A. Belo
