KOVALIMA, 26 Marsu 2025 ( TATOLI) – Prezidente Repúblika José Ramos Horta hala’o lansamentu atividade kompetisaun dada tali entre Postu administrativu hitu no korrida kavalo, iha Suku Suai Loro, Postu administrativu Suai, Munisípiu Kovalima.
Kompetisaun dada tali entre postu administrativu hitu ne’e fahe ba kompetisaun dada tali feto ho mane husi postu sira hanesan Postu Fatululik, Fatumea, Tilomar, Maukatar, Suai no Zumalai.
Ho nune’e atividade dada tali referida seidauk bele fó rezultadu tanba seidauk tama iha faze finál.
“Mai iha ne’e atu partisipa kompetisaun kurrida kuda no futu manu iha kampu Suai no prezensa mós bainaka husi nasaun viziñu Indonézia atividade dada tali”, Horta dehan ba jornalista iha Kovalima ohin.
Durante prezensa PR iha munisípiu Kovalima ne’e akompañadu hosi asesór prinsipál asuntu polítika PR, Jeneral reformadu Lere Anan Timur, Sekretariu Estadu Arte no Kultura no Sekretáriu Estadu Dezenvolvimentu Lokál, Vise-ministru asuntu Infraestrutura MOP, Vise-ministru Komérsiu Indústria.
Aleinde lansa atividade dada tali, iha momentu ne’e mós lansa kompetisaun kurrida kavalo ekipa ba dahuluk husi Timor-Leste ho nasaun viziñu Indonézia.
Bazeia ba dadus ne’ebé TATOLI asesu husi seksaun kurrida Kavalo katak komisaun organizadora rejista kuda hamutuk 37 ne’ebé mak atu partisipa iha eventu korrida kavalo iha kampu Suai Loro, munisípiu Kovalima.
Kampu Korrida kavalo ho naruk metru 700 durante atividade kompetisaun Kuda hamutuk 37 kuda ho klase lokál ho tipu B, C no D.
Tuir observasaun Jornalista TATOLI nota iha tereñu katak,durante hala’o atividade korrida kavalo adeptu sira entuziasmu hodi partisipa atividade korrida kavalo no dada tali.
Jornalista:Celestina Teles
Editór:Rafael Ximenes de A. Belo
