DILI, 27 Marsu 2025 (TATOLI)—Iha Marsu, tinan ne’e, Sentru Internamentu Vera-Krúz halo rastreiu ba inan ilizibilidade sira hamutuk 90. Husi númeru ne’e, na’in lima mak pozitivu kankru serviks.
“Sentru Saúde Internamentu ida-ne’e halo rastreiu ba inan ilizibilidade sira liuliu ba idade 30-49 no dadus akumulativu ne’ebé mak pesoál saúde treinadu sira akumula iha loron 25-26 Marsu hamutuk 90. Husi ne’e, ita deteta kazu positivu kankru serviks na’in-lima. Entaun, sira daudaun ne’e hetan ona tratamentu,” Xefe Sentru Saúde Vera-Krúz, Marilia Piedade, informa ba jornalista sira, iha Vera-Krúz, kinta ne’e.
Nia husu ba inan sira mai iha Sentru Internamentu Vera-Krúz hodi halo chek up tanba iha ona pesoál treinadu sira atu halo atendimentu.
Iha parte seluk, Médiku Espesialista Onkolojia iha Hospital Nacional Guido Valadares (HNGV), João Teodosio Amaral, hateten husi totál moras kankru ne’ebé rejista iha HNGV hamutuk 1.400 resin.
“Moras kankru ne’ebé mak rejistadu iha HNGV nafatin dadus anteriór. Husi totál kazu sira-ne’e, kankru susun mak númeru boot. Tuir mak kankru tiroid parte kakorok nian, depois kankru kolorektal, kankru serviks no ikus mak kankru raan,” João esplika.
Nia hatutan, husi kankru sira-ne’e, implika pasiente balun mate tanba sira mai ho stadium grave, entaun la konsege halo tratamentu no la konsege halo transferénsia ba rai-li’ur liuliu ba kemoterapia sira.
Espesialista ne’e haktuir, durante ne’e kazu barak mak halo transferénsia bá rai-li’ur halo tratamentu no balun konsege rekupera no balun iha kontinuasaun tratamentu no dadaun ne’e médiku sira iha HNGV halo hela tratamentu ba sira.
Jornalista: Felicidade Ximenes
Editór: Xisto Freitas da Piedade
