DILI, 26 Marsu 2025 (TATOLI)—Diretór Jerál Korporativu Ministériu Saúde, Valentino Lisboa Marçal, hateten tinan ne’e (2025), Ministériu Saúde (MS) sei adkiri (sosa) ambulánsia multifunsaun 12 hodi distribui ba munisípiu sira.
“Tinan ida-ne’e, ami sei halo akizisaun ba ambulánsia multifunsaun ho tipu Hilux no Yace hamutuk 12 hodi koloka bá iha Munisípiu Kovalima, Baukau, Dili no munisípiu sira-ne’ebé enfrenta difikuldade ba ambulánsia multifunsaun,” Valentino Lisboa dehan iha nia kna’ar fatin, Kaikoli, kuarta ne’e.
Nia haktuir katak Governu aloka ona orsamentu ho montante rihun $886 ba akizisaun ambulánsia referida.
Nia haktuir, ambulánsia multifunsaun ualu ne’ebé mak avaria iha munisípiu haat, daudaun ne’e iha ona garajen Ministériu Saúde (MS) hodi halo prosesu manutensaun.
“Ami sei hadi’a ambulánsia multifunsaun sira ne’ebé mak daudaun iha ona garajen ne’e, hodi halo prosesu manutensaun. Husi Munisípiu Baukau rua, Vikeke rua, Ainaru rua no Bobonaru rua,” nia esplika.
Valentino informa, kona-ba prosesu manutensaun ne’e, iha ona prosesu aprovizionamentu nia laran, tanba sei loke konkursu ba empreza sira-ne’ebé mak hakarak aplika, hodi halo manutensaun ba ambulánsia hirak-ne’e.
Jornalista: Felicidade Ximenes
Editór: Xisto Freitas da Piedade
