KOVALIMA, 28 Marsu 2025 (TATOLI) – Xefe Estadu, iha Timor-Leste, José Ramos Horta sei ko’alia ho Primeiru Ministru (PM), Kay Rala Xanana Gusmão hodi fó apoiu atu haki’ak kuda.
Razaun PR hakarak ko’alia ho PM tanba relasiona ho atividade kompetisaun korrida kavalu ne’ebé hala’o iha kampu Suai Loro, Munisípiu Kovalima, tanba iha kompetisaun korrida kavalu iha nível internasionál, husi nasaun viziñu Indonézia mak sai primeiru lugar.
“Atu timoroan iha kompetisaun korrida kavalu sai manan-na’in dahuluk, Senhor Rui Lopes ho nia tradisaun dezde iha tempu portugés. Atu prepara di’ak liu, PR sei apoiu ko’alia ho PM no Ministériu Turizmu hodi fó apoiu di’ák liu, ba haki’ak kavalu halo tratamentu ba kavalu ho rasa nune’e presiza tau matan ba kavalu iha Timor”, PR José Ramos Horta hato’o iha nia entrevista iha Suai Loro, ohin.
Tuir Horta, kavalu Timor hanesan tradisaun no istória nune’e organiza kompetisaun korrida kuda mai iha Timor-Leste neineik sei ba oin tanba tinan ne’e hatudu susesu boot.
Notísia relevante:PR interrese hadi’a kampu korrida kavalu sai di’ak liu iha Suai Loro
Iha sorin seluk, Kavalu-na’in husi Malaka, Indonézia, Louise Lucky Taolin, sente orgullu reprezenta Indonézia hodi partisipa iha kompetisaun jogu tradisionál kuda halai taru ka korrida kavalu iha Timor-Leste.
“Ha’u sente orgullu bainhira mai husi Malaka reprezenta Indonézia partisipa iha eventu ne’e, ho nune’e ha’u hato’o obrigada ba Estadu Timor-Leste, organiza kompetisaun korrida kavalu ne’e konvida mós ami. Ne’e hanesan fó oportunidade atu hasoru família”, nia dehan.
Tanba, tuir nia, Timor-Leste ho Indonézia família nune’e liuhusi kompetisaun korrida Kavalu ne’e hodi fó oportunidade ba nasaun viziñu Indonézia atu hamutuk ho Timor-Leste.
“Ha’u espera ba futuru kompetisaun korrida kavalu kontinua hala’o labele tinan rua, tolu, foin hala’o dala ida, maibé kada tinan hala’o nune’e ita bele hasoru no hala’o mós iha fatin sira seluk”nia fó hanoin.
Ho nune’e, nia promete Timor-Leste organiza eventu kompetisaun jogu tradisionál korrida kavalu nia parte sei partisipa tanba eventu korrida kavalu iha Timor –Leste nia nunka atu falta hodi mai atu partisipa.
“Ha’u sei mai fali no ha’u nunka falta sempre partisipa hahú iha Batugade, Oekusi no Suai, ha’u sempre iha nune’e ba futuru kontinua loke tan klase lokál nune’e adeptu Indonézia ho Suai barak liu. Tanba iha Suai ema ne’ebé sai Joky kavalu barak”, nia haktuir.
Joky ne’e ema ne’ébé halai kuda ka halo kuda halai.
Kompetisaun jogo tradisionál korrida kavalu ida-ne’e hanesan tradisaun husi Timor-Leste, tanba avó sira mak husik hela nune’e labele halo lakon atu kontinua promove nafatin atividade desportu ne’e.
Aleinde uza kuda hodi hala’o eventu kompetisaun molok ne’e kuda uza hodi hala’o funu no uza ba transporte, tanba avó sira la hatene karreta no motorizada maibé sira koñese mak kuda ka kavalu nune’e labele halakon kontinua promove.
Jornalista: Celestina Teles
Editór: Rafael Ximenes de A. Belo
