DILI, 28 Marsu 2025 (TATOLI)-Sekretáriu Estadu Toponímia Organizasaun Urbana (SEATOU), Germano Santa Brites Dias husu komunidade sira atu labele okupa rai Estadu no espasu públiku hodi harii uma no empreza ruma maske kapitál mak sai sentru ba finansiamentu.
“Povu mai Dili tanba ekonomia, ne’e loos kedas tanba ita hotu-hotu hatene katak osan ne’e sei kuda iha kapitál, dezentralizasaun poder lokál ne’e sei metade hela iha Governu sentrál. Tanba ne’e, ita prepara hela okaziaun para 2026 dezentralizasaun poder lokál ne’e tenke ba ona kraik”, Sekretáriu Estadu hateten ba jornalista sira iha, salaun enkontru MAE, Kaikoli, Dili, kinta ne’e.
Dili hanesan fatin destinasaun ba finansiamentu ekonómiku ema nian, tuir governante ne’e, ema hotu-hotu mai sidade atu buka osan hodi moris, maibé bainhira hetan ona buat sira ne’e, atu harii uma ruma iha fatin ne’ebé mak própriu, labele okupa espasu públiku hodi hamosu risku ba nia-an rasik, liuliu hari’i uma iha mota-ninin no tasi-ibun.
“Mai Dili ne’e tanba saida, ita buka servisu tanba osan. Agora ita iha osan tiha ona, ita hetan tiha ona servisu, ita mós iha ona osan, depois ita-nia rikuso’in sira ita hetan ne’e, ita laba kuda iha fatin ne’ebé mak própiu, ita ba tau iha mota-laran, iha mota-ibun, tasi-ibun. Kuandu despeza administrativa hanesan ne’e, sé mak lakon. Ne’e ita ida be hatene hela hetan servisu ne’e ita maka lakon duni”, nia konsidera.
SEATOU reforsa katak despeza administrativu ida-ne’ebé foin daudaun akontese iha fulan janeiru, kuandu udan-boot, ita hotu lahatene derrepente komunidade sira ne’ebá bee boot fó risku ba sira.
“Tanba ne’e mak fó hanoin hela kedas para tau ba ulun, karik iha osan atu kuda iha sidade Dili tenki husu lisensa ka husu informasaun iha Obras públika no terras propriedade, para regulamentu sira ne’e, ita bele apar didi’ak mak ita bele halo servisu”, nia dehan.
Tanba, Governante hateten, prosesu urbanizasaun ne’e la’o halo foun sidade, maibé atu konsolida urbanizasaun nne’ebé di’ak liután. Tanba ne’e konsiderasaun propriedade rai mós iha kategória tolu; rai públiku, rai Estadu no rai privadu. Tanba ne’e, husu ba komunidade hotu atu labele kuda rikuso’in iha rai Estadu liuliu okupasaun espasu públiku no hakru’uk ba lei ordenamentu territóriu.
Notísia relevante:Governu sei la autoriza vendedór sira fa’an sasán iha espasu públiku
Jornalista: Alexandra da Costa
Editór: Rafael Ximenes de A. Belo
