BOBONARU, 28 Marsu 2025 (TATOLI)—Eletrisidade Timor-Leste, Empreza Públika (EDTL, E.P) Munisípiu Bobonaru, iha tempu badak sei implementa tan Projetu Eletrifikasaun Komunitária (PEK) ba aldeia haat iha postu administrativu Bobonaru, ne’ebé durante tinan 20-resin ona la asesu enerjía elétrika.
Jestór EDTL, E.P Munisípiu Bobonaru, Mario de Jesús, konfirma liña komunitária ne’e sei instala ba uma-kain 173 ne’ebé kompostu husi aldeia Purugua suku Ilat-laun uma-kain 27, Holbese suku Leber 32, parte suku Ai-Asa nia aldeia Laho 59 no bairu ida iha aldeia Odelgomo ho totál uma kain 56.
Notísia Relévante: EDTL ameasa hakotu liña eletrisidade ba uma-kain 400 resin
“Ha’u simu tiha despaixu Prezidente EDTL, E,P nian, iha ne’ebá klaru tiha ona katak iha postu administrativu Bobonaru aldeia Purugua, Holbese no Holsa-Taz inklui bairu ida iha aldeia Odelgomo ne’e tama iha liña komunitária,” Xefe unidade EDTL, E.P Munisípiu Bobonaru, Mario de Jesús, informa ba Agência Tatoli, iha nia kna’ar fatin, sesta ne’e
Nia fundamenta, tempu badak hahú ona servisu iha terrenu tanba EDTL, E.P Munisípiu Bobonaru rekiza hotu ona materiál iha Armajen Nasionál.
“Hein ba foti de’it ona maibé ha’u sei seidauk bele ba fatin, tanba ha’u sei harrr lai ita-nia kondisaun agora ne’e rai udan-hela. Se sasán ne’e to’o mai, ita tenke lori ba nia fatin. Se udan mak ba ladi’ak ne’e sé mak atu hulan. Se klima di’ak, ita mobiliza ona materiál ba, nune’e bele halo ona servisu,” nia dehan.
Sorin seluk, Xefe suku Leber, postu administrativu Bobonaru, munisípiu Bobonaru, hato’o agradesementi ba Prezidente EDTL, E.P no fiar katak projetu ne’e sei implementa iha tempu besik.
“Ami-nia komunidade prontu atu ajuda servisu foti ai-riin no sasán todan seluk tan, tanba komunidade hein obra ne’e kle’ur ona. Agora, atu mai ne’e sira kontentr loos, tanba dezde uluk sira luta seidauk sentr ba ukun-aan. Agora ho projetu ne’e, sira orgulu no bele sente saida mak ukun-aan ne’e,” nia dehan.
Líder komunitária ne’e reforsa daidaun ne’e ida mós EDTL, E.P implementa hela Projetu Eletrifikasaun Nasionál (PEN) ba aldeia Leber-Taz, Holsa-Taz no Mabelis ne’ebé daudaun ne’e to’o ona faze hari poste ka Ai-riin media no Baixa tensaun, no observa implementasaun projetu ne’e progresu fiziku hatudu rezultadu di’ak.
“Ai-riin sira-ne’ebé dezloka mai iha munisípiu ne’e, husi sentru aldeia Leber-Taz ba Mabesik hari hotu ona, aban hanesan ne’e konklui ona no hein dada fiu de’it ona. Agora husi Sentru Leber-Taz mak seidauk tanba kompañia dehan sira-nia materiál sosa iha Surabaya loron 26 Marsu ne’e mak foin to’o Timor. Ita espera, tempu badak bele mai ona para halo hotu ona,” Xefe suku Lerber hakotu.
Enkuantu EDTL, E.P mós daudaun ne’e implementa Projetu Eletrifikasaun Nasionál iha suku Ai-Asa no aldeia neen iha postu administrativu Loloto’e ho totál uma 1000-resin.
Notísia Relevante: EDTL Bobonaro garante eletrisidade lakan 24 oras iha loron eleisaun
Jornalista : Sérgio da Cruz
Editór : Cancio Ximenes
