KOVALIMA, 29 Marsu 2025 ( TATOLI) – Vise-Ministru Komérsiu no Indústria, Augosto Junior Trindade, sábadu ne’e, reprezenta Prezidente Repúblika (PR) José Ramos Horta entrega nesesidade bázika no espesiál ba família kbiit naton no ema ho defisiénsia na’in-200, iha Postu administrativu Zumalai, Munisípiu Kovalima.
Atividade husi Prezidente Repúblika entrega nesesidade bázika no espesiál reprezenta husi Vise-Ministru Komérsiu Indústria Augusto Junior Trindade hamutuk ho Asesór SSAS PR, Quintiliano Moniz Carvalho.
“Ita-boot sira husik tempu programa husi PR programa ne’ebé la’ós boot liu inisiativa husi PR halo asaun ba ita-nia maluk sira ne’ebé presiza apoiu ruma”Vise Ministru Komérsiu no Indústria, Augosto Jùnior Trindade dehan liuhusi nia diskursu molok entrega nesesidade bázika ba família kbiit naton, iha Zumalai, ohin.
Xefe Estadu fó apoiu ne’e bazeia ba dadus ne’ebé mai husi xefe Suku sira ho nune’e PR ho ekipa mai iha Kovalima durante loron tolu la’o ba fatin hotu hodi hasoru autoridade no inan-aman sira, alunu no manorin sira rona sira nia hanoin kona-ba saida mak presiza nune’e saida mak Estadu no Governu bele ajuda hodi hasai husi situasaun ne’ebé komunidade enfrenta.
Reprezentante PR informa, PR la partisipa direta hodi entrega apoiu sira ne’e tanba partisipa atividade importante no urjente balun. Enkuantu, Xefe Estadu nia prezensa iha Kovalima hanesan parte ida Estadu iha komunidade nia leet tanba PR hanesan mós liman-ain povu ni’an hodi haklaken saida mak povu halerik Governu atu halo.
PR nia vizita iha munisípiu Kovalima importante tebes, tanba Kovalima hela besik iha fronteira ho nasaun viziñu Indonézia.
Ho nune’e durante prezidente PR iha Kovalima husik mensajen ba komunidade sira katak TL nia fronteira tenke dignu no metin bele garante populasaun nia moris mudansa uitoan.
Nesesidade ne’ebé Xefe Estadu fó apoiu ne’e mak hanesan, Foos marka Manu vitória saku ida, Manu tolun Rak ida, Mina te’in Bimoli litru lima ida no nesesidade Espesial sira seluk.
Molok atu entrega, Asesór SSAS PR Quintiliano Moniz Carvalho klarifika, PR entrega nesesidade ladun barak maibé entrega sasan ne’e Xefe Estadu hatudu nia domin boot ba povu.
“Labele sukat sasan barak ka uitoan sukat ba Xefe Estadu nia domin no nia fuan hamutuk ho ita-boot sira ne’ebé kbiit naton”, nia dehan.
Nesesidade espesiál ne’ebé xefe Estadu fó apoiu mai husi PR nia amigu Nipon husi Japaun hodi haruka roupa, sapatu, kalsa no seluktan.
Administradór Postu administrativu, Zumalai, Alipio Magno, relata, dadus komunidade husi Zumalai ne’ebé atu simu nesesidade bázika husi Prezidente Repúblika hamutuk 200.
“Ita-nia komunidade ne’ebé mak atu simu nesesidade bázika no Espesial husi xefe Estadu mai husi suku hanesan Zulo, Lour, Fatuleto, Mape, Lepo Tashilin Raimea no Esekai”, autoridade ne’e informa.
Jornalista: Celestina Teles
Editór: Rafael Ximenes de A. Belo
