DILI,31 Marsu 2025 (TATOLI)— Boxista Elísio Raimundo Gaio husi klubu Boxing Maubere Puru (CBMP), aban bá Bali-Indonézia, hodi tuir eventu Holywings Sport Show (HSS) iha Bali- Denpasar , iha loron 5 fulan-Abríl tinan ne’e.
“Ami ekipa tomak hakarak hato’o obrigadu ba empreza Timoroan ne’ebé fó ona apoiu ami, liu-liu imprensa Virni Uni pesoál, Roman Tour Travel no mós Lotaria Criss no inklui empreza Timoroan ne’ebé mós fó apoiu ba ami. Husu ba timoroan tomak atu fó apoiu husi orasaun, atu nune’e jogadór hanesan boxista di’ak ida ho naran Elísio Raimundo Gaio hodi bá tuir kompetisaun iha Bali-Indonézia iha loron 5 fulan-Abríl tinan ne’e,” Prezidente Clubu Boxing Maubere Puru (CBMP), Julivio Pereira Pinto, hatete liuhusi komunikadu imprensa iha Komite Olimpikus,ohin.
Boxista Elísio Raimundo Gaio sei hasoru Boxista Alfaro Urbinas husi Indonézia nian. Maibé la’ós joga profisionál tanba bá ne’e hanesan amatir profisionál, ida ne’e hanesan atu aumenta nia mentalidade, nune’e nia bele prepara di’ak liutan ba tuir kompetisaun internasionál SEA Games iha Tailándia.
“Ami-nia ekipa ne’e foun no ita-nia boxista Elísio Raimundo Gaio ne’e mós foin lalais tuir ona eventu iha nasaun barak iha nivel internasionál, no loron hirak liu ba mós nia hetan primeiru lugar iha nia klase akadémika ne’ebá kona-ba PNTL Cup,” nia afirma.
Klubu Boxing Maubere Puru ne’e ho vizaun no misaun hakarak atu promove juventude ne’ebé iha abilidade no mós poténsia iha modalidade boxing nian atu mai hamutuk liuhusi desportu lori Timor-Leste ba mundu no hamorin nasaun nia naran.
Kona-ba eventu ne’e, Clubu Boxing Maubere Puru dirije proposta ba Ministériu Juventude, Desportu, Arte no Kultura (MJDAK), maibé too agora seidauk simu informasaun ruma husi ministériu refere.
Iha fatin hanesan, Boxista Elísio Raimundo Gaio, hateten preparadu no prontu ba kompete iha eventu HSS iha Bali.
“Ha’u nia preparasaun ha’u sente másimu tebes, tanba eventu ida-ne’e bele aumenta tan esperiénsia di’ak liutan, ha’u sei promote sei hetan valor no hatudu ba nasaun no ba ita bandeira katak ita bele,” Boxista ne’e promete.
Jogu ida-ne’e atu aumenta skill nune’e ba futuru bele kompete iha SEA Games iha Tailándia.
Jornalista : Felicidade Ximenes
Editor: Florencio Miranda Ximenes
