DILI, 31 marsu 2025 (TATOLI) – Xefe Estadu Timor-Leste, José Ramos Horta, saúda kompatriota musulmanu hotu iha Timor-Leste no iha mundu tomak, ne’ebé ohin selebra loron Idul Fitri, hafoin tuir faze Ramadhan ho ritual jejun durante fulan-ida.
Biban ne’e, Xefe Estadu hato’o ninian amizade, fraternidade no solidariedade ba komunidade musulmanu tomak ne’ebé ohin selebra Idul Fitri iha mundu tomak.
“Ita tenke hakuak malu, moris iha domin no dame nia laran, respeita relijiaun hotu-hotu, maske dalan fiar nian la hanesan, Maromak ida de’it,” Xefe Estadu afirma iha Mesjid-Kampung Alor,ohin.
Xefe Estadu reforsa sidadaun ida-idak tenke moris espíritu domin, dame no unidade tuir dokumentu fraternidade umana ne’ebé asina husi líder katóliku no musulmanu sira.
Iha fatin hanesan, Embaixadór Indonézia iha Timor-Leste, Okto Dorinos Manik, hateten katak lori Governu Indonézia nia naran hato’o bemvindu ba komunidade musulmanu iha Timor-Leste ne’ebé selebra Idul Fitri.
“Loron espesiál ida ksolok no grasa nian ba ita bainhira ita selebra Idul Fitri. Ita haree katak ita selebra Ramadan no Idul fitri iha fulan ida-ne’e hanesan komunidade Katólika selebra Páskua. Ohin ita selebra ksolok, saúde no moris di’ak ita hotu nian no populasaun Timor-Leste tomak,”diplomata ne’e dehan iha Kampung Alor,ohin.
Embaixadór ne’e esplika, komunidade iha Timor-Leste halo serimónia abertura iha Embaixada no família ida-idak sei selebra, maibé iha Indonézia ema hotu ba feriadu iha sira-nia rai.
Tuir diplomata ne’e, selebrasaun ne’e nu’udar selebrasaun perdaun husi fuan-laran ba komunidade islámiku atu ema hotu bele sente ksolok.
“Komunidade musulmanu bele kontribui ba dezenvolvimentu no armonia sosiál. Ami apresia tebes toleránsia ne’ebé hatudu husi kolega timoroan sira iha rai-laran,” nia hateten.
Jornalista : Felicidade Ximenes
Editór : Florencio Miranda Ximenes
