VIKEKE, 01 Abríl 2025 (TATOLI)—Ekipa Instituisaun Apoia Dezenvolvimentu Emprendedorizmu (IADE) nasionál hamutuk ho ADRA Timor-Leste, tersa ne’e, realiza formasaun negósiu ba negosiante sira munisípiu Vikeke.
Diretór Ezekutivu Ekipa Instituisaun Apoia Dezenvolvimentu Emprendedorizmu (IADE), Filomeno Marcelino Belo, hateten IADE papél mak fó kapasitasaun negósiu ba negosiante sira iha Timor-Leste hodi eleva negosiante sira-nia koñesementu kontribui ba dezenvolvimentu ekonómia nasionál.
“Tanba ne’e, ami mai to’o iha munisípiu sira hodi oferese formasaun ba ita-nia negosiante sira iha Vikeke. Nune’e ba negosiante sira labele hanoin ba osan de’it maibé ita haree liu ba kapasitasaun, bainhira ita-nia negosiante sira iha koñesementu bele tuir kompetisaun. Ba kompetisaun se mak sai manán-na’in mak foin hetan fundu hodi haboot ita-nia negosiante sira negósiu ne’ebé sira planeia iha sira negósiu. Ho ida-ne’e mak ami oferese kapasitasaun ba negosiante sira oinsá jere negósiu,” Filomeno Marcelino Belo hateten iha serimónia abertura formasaun Komesa Ita-nia Negósiu (KIN) iha salaun IADE Vikeke, ohin.
Filomeno afirma, tempu agora Governu la’ós oferese orsamentu ba komunidade maibé liuhusi formasaun uluk lai, depois mak apoiu fundu hodi jere ba negósiu.
“Se ita fó osan hela de’it maibé ema laiha koñesementu ba jestaun, ha’u sente ita apoiu osan gastu de’it. Tan ne’e, ha’u hato’o agradesimentu ba parseiru sira-ne’ebé fó apoia ami hodi kapasita ita-nia negosiante sira, tanba iha tinan oin (2026) sei iha kompetisaun ita-nia negosiante sira-ne’e bele partsipa,” nia dehan.
Nune’e, nia husu, formandu sira tenke atensaun ba formasaun komesa ita-nia negósiu (KIN) ne’ebé daudaun ne’e oferese ba negosiante sira iha Vikeke.
“Tanba ne’e, ha’u husu ba benifisiáriu sira fó atensaun ba formasaun faze KIN nian, ne’ebé sei hanorin negosiante sira kona-ba kontajen liuliu ba gastu sira ba negósiu no rendimentu detallu. Tan ne’e, ha’u husu negosiante sira mós halo identifikasaun merkadu tanba dalabarak ita la halo negósiu ita-nia alvu merkadu la klaru ida-ne’e mós difikulta negosiante sira-nia negósiu,” nia hateten.
Nia apela, formandu sira aproveita formasaun rne’e hodi esplora matenek sira-ne’ebé formadór husi IADE no ADRA oferese.
Enkuantu, nia dehan, formasaun ne’e realiza hetan apoia husi Uniaun Europeia liuhusi Organizasaun Internasionál Labor, Agroflorestry Skill no ADRA, formasaun referida durante loron lima (5) hahú husi tersa (01 Abríl 2025) ne’e no sei ramata iha sábadu (05 Abríl 2025) ne’e.
Iha fatin hanesan, formanda Merlinda da Cruz, hato’o agradeseimentu ba IADE ne’ebé oferese formasaun negósiu nian ba negosiante sira munisípiu Vikeke hodi jere atividade negósiu ne’ebé komunidade sira implementa.
“Ha’u hato’o agradesimentu ba IADE konvida ami hodi partisipa iha formasaun negósiu nian. Ha’u sente formasaun ida-ne’e bele ajuda ami, atu ba futuru ami bele jere ami-nia osan kooperativa nian, hodi hala’o negósiu karik ho di’ak. Tanba, liuhusi formasaun ida-ne’e foka liu ba literasia finanseiru no Komesa Ita-nia Negósiu (KIN), ha’u fiar katak ho formasaun sira-ne’e ami bele hadi’a ami-nia koñesementu ba negósiu nian,” nia dehan.
Iha formasaun ne’e, formandu ne’ebé partisipa iha formasaun KIN liuhusi projetu agrofloresta negosiante husi postu Vikeke Vila, Ossú no Lakluta hamutuk na’in-25.
Serimónia abertura ba formasaun loron lima ne’e partisipa husi funsionáriu IADE nasionál, munisípiu no reprezenta ADRA Timor Leste.
Jornalista : Vitorino Lopes da Costa
Editór : Cancio Ximenes
