VIKEKE, 01 Abríl 2025 (TATOLI)—Diretór servisu Diresaun Nasionál Rejistu Notariadu (DNRN) munisípiu Vikeke, Rogério da Costa, informa hahú husi fulan-Janeiru to’o Marsu ne’e, servisu DNRN Vikeke konsege prodús pupulasaun sira-nia dokumentu Billete Identidade (BI) hamutuk 3.423.
“Husi dokumentu BI sira-ne’e, ami emprime provizóriu ho surat-tahan mutin mak distribui ba ita-nia populasaun sira, tanba ita laiha blanku BI orijinál,” Rogério da Costa hateten ba Agência Tatoli iha nia kna’ar fatin, Beloi, ohin.
Nia dehan, bainhira populasaun sira mai trata BI mak funsionáriu sira aprezenta ba populasaun sira kona-ba blanku ne’ebé laiha no emprime ho surat-tahan mutin, depois blanku orijinál nasionál distribui mai mak print-out ba blanku orijinál.
“Ba blanku ne’ebé laiha, ha’u hato’o ona ba nasionál maibé blanku BI iha nasionál agora seidauk iha. Nune’e, ita hein, provizóriu uza surat-tahan mutin. Bainhira blanku iha fali mak populasaun sira mai troka fali ba blanku orijinál,” nia hateten.
Kona-ba atendementu, nia dehan, pupulasaun sira ba trata dokumentu Billete Identidade (BI) mak iha loron segunda to’o sesta, hahú husi tuku 08h30 dadeer to’o 17h00 lorokraik, depende ba populasaun sira-ne’ebé mai iha servisu DNRN Vikeke.
“Atendementu ba BI, ami la determina loron depende ita-nia populasaun sira-ne’ebé mai trata sira-nian dokumentu BI to’o tuku 17h00 lorokraik,” nia dehan.
Tuir dadus, iha fulan-Janeiru ne’e DNRN Vikeke prodús dokumentu Billete Identidade hamutuk 1.591, iha fulan-Fevereiru prodús hamutuk 1.391 no iha fulan-Marsu hamutuk 441.
Entretantu, funsionáriu ervisu Diresaun Rejistu Notariadu (DNRN) munisípiu Vikeke hamutuk na’in-14 ne’ebé sufisiente ba atendementu ba populasaun sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
