DILI, 01 Abríl 2025 (TATOLI)–Deputadu Bankada Opozisaun husi Partidu Libertasaun Populár (PLP), Adolfo Martins levanta kestaun iha sentru saúde Glenu enfrenta difikuldade atende pasiente bainhira aletrisidade mate.
“Kona-ba preokupasaun sentru saúde kapitál Glenu, liuliu ba jeradór ne’ebé daudaun tau iha ne’ebá la funsiona kuaze besik tinan-tolu, agora bainhira eletrisidade mate pasiente sira lubun ne’ebé baixa iha sentru saúde inklui profisiónál saúde sira uza de’it mak lampra telefone hodi bele fó partu ba inan-feton sira,” nia levanta liuhusi reuniaun plenária Parlamentu Nasionál (PN), tersa ne’e.
Aleinde ne’e, pasiente sira dalaruma uza hela soru atu bá haris-fatin uza lampra telefone de’it.
“Agora situasaun ne’e la’ós foin mak akontese, ne’e tempu naruk ona. Tanba ne’e husu atu fó solusaun,” nia akresenta.
Reprezentante povu ne’e haktuir, pasiente ho moras respiratóriu bainhira bá sentru saúde no ahi mate labele uza osijéniu.
“Jeradór tau iha ne’ebá la funsiona totál, kalan ita bá iha ne’ebá sentru saúde ne’e nakukun hanesan área rurál laiha eletrisidade,” Deputadu ne’e tenik.
Iha sorin seluk, Deputada Bankada Opozisaun husi Kmanek Haburas Unidade Timoroan (KHUNTO), Irene Gonzaga Sarmento, kontinua husu entidade kompetente atu tau-atensaun ba fasilidade saúde balun ne’ebé laiha ai-moruk vasina ba bebé ne’ebé foin moris no bebé to’o tinan-ida fulan-neen.
“Ha’u ko’alia tanba to’o rasik iha fatin atu lori ha’u-nia oan ba vasina fulan-sia nian, maibé parteira sira hateten katak agora ai-moruk laiha kuaze fulan-tolu ka haat ona. Ministériu Saúde tenke tau atensaun urjente, tanba labarik sira moris mai tenke vasina atubele nia hetan saúde di’ak,” nia hato’o.
Deputada Bankada Opozisaun husi Frente Revolsionária de Timor-Leste Indepedente (FRETILIN), Lídia Norberta, levanta postu saude Lauhata-Likisá komunidade iha ne’ebá preokupa ai-moruk paracetemol no amoxilin la sufisente atende pasiente.
Reprezentante Governu liuhusi Vise-Ministru ba asuntu Parlamentár, Adérito Hugo da Costa, rejista intervensaun sira hotu no sei envia ba ministériu tutela hodi bele responde.
”Ha’u sei envia ba Ministériu Saúde atu haree asuntu ne’e tékniku no operasaun, ida-ne’e normál loos, la’ós ita atu hakilar malu, maibé di’ak tebes Deputadu foti asuntu ne’e,” nia dehan.
Governante ne’e lamentável tebes ba kondisaun eletrisidade iha sentru saúde Glenu, ne’ebé tuir loloos jestór sira iha ospitál no ministériu labele husik hela jeradór rezerva ho kondisaun a’at.
Vise-Ministru sei hato’o mós kona-ba kondisaun falta ai-moruk iha fasilidade saúde balun.
“Agradese ba Deputadu sira atu kontinua fó alerta hela ba serbisu públiku sira ne’ebé iha saúde ninian, ne’e refleta ita hotu nia preokupasaun atu fasilidade saúde sira tenke nafatin halo atendimentu ba ita-nia populasaun iha territóriu tomak,” nia tenik.
Jornalista : Nelson de Sousa
Editora : Julia Chatarina
