VIKEKE, 01 Abríl 2025 (TATOLI)- Servisu sukursál Servisu Rejistu no Verifikasaun Emprezariál, Institutu Públiku (SERVE,I.P) munisípiu Vikeke, durante trimestre dauluk konsege rekolla reseita taxa envolvimentu hamutuk $3,597 ba kofre estadu.
Koordenadór SERVE,I.P munisípiu Vikeke, Filomeno Sequeira da Silva Amaral, haktuir, hahú husi fulan Janeiru to’o Marsu SERVE,I.P Vikeke rekolla reseita husi rejistu dokumentu komersiál sira Vikeke hamutuk $3,597 mak kontribui ba kofre estadu.
“Prosesu envolvimentu sira-ne’e mai husi ita-nia empreza sira-ne’ebé hala’o negosiu, nune’e sira trata dokumentu lisensa komersiál, depois empreza sira halo rejistu hotu bá direta selu iha banku. Nune’e ba reseita kompostu husi novu rejistu, renovasaun, alterasaun atividade negosiu nian”, Koordenadór SERVE,I.P Vikeke ne’e ba Tatoli, iha ninia knaar fatin, Beloi, ohin.
Kona-ba rejistu komersiál husi fulan Janeiru rejistu foun hamutuk 11, renovasaun hamutuk 29 no alterasaun 4 ho totál 44, fulan Fevereiru rejistu foun hamutuk 23, renova hamutuk 39, alterasaun 14 totál hamutuk 76. Enkuantu iha fulan Marsu rejistu foun 18, renovasaun 16 no alterasaun 11 totál 45.
“Ita-nia komersiante sira selu bazeia ba sira-nia atividade ne’ebé sira hala’o, hanesan selu renovasaun komersiál selu $5, prazu atividade tinan ida selu $10 no atividade liga ba sujeita nian hanesan restaurante, abastamentu, ketrin selu $60 kada tinan ida. Nune’e, durante fulan tolu ne’e ami simu tipu rejistu enin (negosiu ki’ik) no unip Lda mak halo renovasaun no alterasaun ba atividade negosiu nian”, nia hato’o.
Tuir dadús reseita envolvimentu kada fulan hahú husi fulan Janeiru hamutuk $686, Fevereiru hamutuk $1995 no Marsu $ 916.
Enkuantu, kona-ba dezafiu nia dehan, hahú husi Janeiru to’o Marsu SERVE,I.P menus rekursu umanu sai difikuldade ba atendementu kliente komersiante sira-ne’ebé mai trata sira nian domentu lisensa komersiál.
“Dezafiu ne’ebé ami hasoru maka menus rekursu umanu ne’ebé daudaun ne’e servisu iha SERVE Vikeke, kompara ba uluk ami hamutuk na’in-12 ha’u sente sufisiente, maibé agora ami hela na’in-8 tanba ne’e mak difikulta ba ami-nia atendementu. Ami-nia problema menus rekursu ha’u hato’o ona ba ansionál, maibé sira dehan hein de’it”. nia akresenta.
Entretantu, dadaun ne’e funsionáriu servisu iha SERVE,I.P hamutuk na’in-8 kompostu husi koordenadór, administrasaun, lojistika no atendementu kliente.
Jornalista: Vitorino Lopes da Costa.
Editór : Cancio Ximenes
