DILI, 01 Abríl 2025 (TATOLI)—Inspetór Jerál Saúde, Horácio Fernandes Ribeiro, hateten Gabinete Inspesaun, Fiskalizasaun no Auditoria Ministériu Saúde iha tinan 2024, apreende ai-moruk item 500 iha kioske no loja sira iha munisípiu neen hanesan Munisípiu Ermera, Kovalima, Baukau, Lautein, Likisá no Manatutu.
“Ami iha autoridade atu kontrola unidade saúde no farmásia privada sira-ne’ebé eziste iha rai-laran hodi garantia kualidade ai-moruk. Entaun, iha 2024, ami apreende ai-moruk item 500-resin iha kioske no loja sira iha munisípiu neen,” Horácio dehan ba TATOLI iha nia kna’ar fatin, Ministériu Saúde (MS), Kaikoli, tersa ne’e.
Inspetór Saúde ne’e haktuir katak loja no kioske sira fa’an ai-moruk nian hanesan paracetamol, amoxicilina, panadol, cotri no ampicilina inklui antibiótiku sira, ida-ne’e mak ekipa sira foti hotu.
Nia esklarese loja no kioske sira-ne’e laiha kondisaun atu fa’an ai-moruk sira-ne’e bá populasaun sira.
“Bainhira apreende, ami aprezenta kuantidade ai-moruk ba Ministra Saúde, Élia Amaral, nune’e iha fulan-Dezembru tinan kotuk ami halo ona destroisaun,” nia relata.
Horácio Ribeiro husu ba negosiante hotu atu kria kondisaun no halo proposta lisensiamentu ba MS, molok atu fa’an ai-moruk sira-ne’e bá populasaun sira.
Nia husu ba farmásia no empreza importadór sira atu labele fa’an ai-moruk ho kuantidade boot ba sidadaun sira, más tenke fa’an de’it ai-moruk ne’ebé vale ba loron tolu ka lima.
Entretantu, iha 2024, formásia 10-resin mak kontra Lei númeru: 12/2024 no Gabinete Inspesaun, Fiskalizasaun no Auditoria Ministériu Saúde rekolla koima hamutuk rihun-lima.
Jornalista: Felicidade Ximenes
Editór: Xisto Freitas da Piedade
