KOVALIMA, 02 Abríl 2025 (TATOLI) – Prezidente Autoridade Munisípiu Kovalima, Miguel Armada Cadoso fó sai katak pakote estrada balun iha munisípiu Kovalim tama ona iha prosesu konkursu públiku.
“Estrada postu administrativu Tilomar no Fatumea sei aat hela maibé Kovalima lalika triste ha’u hakarak partila informasaun ba ita-boot sira estrada iha Zumalai tama ona iha konkursu publiku” Autoridade Kovalima Miguel Armada Cardoso, dehan ba jornalista sira iha AMC ohin.
Autoridade mós dehan, aleinde estrada Zumalai tama iha konkursu públiku estrada sira seluk mak rejista ona iha sistema prosesu atu tama iha faze konkursu públiku mak estrada sira hanesan husi kapitál munisípiu liga ba Postu administrativu Maukatar.
Estrada husi Postu administrativu Tilomar liga ba Postu administrativu Fohorem no estrada husi Tilomar liga ba Postu administrativu Fatumea munisípiu Kovalima ne’ebé iha 2025 ne’e atu tama hotu iha prosesu konkursu públiku.
Notísia relevante:Estrada nakonu tahu difikulta komunidade Fatululik lori produtu lokál ba merkadu
Líder munisípiu ne’e haktuir, iha tempu udan mosu inundasaun, bele responde lalais atu halo normalizasaun tanba ekipamentu pezadu Institutu Jestaun Ekipamentu, Institutu Públiku (IGE,I.P) bele responde situasaun emerjénsia.
“Daudaun ne’e IGE,I.P mós hamutuk ho ita iha ne’e nune’e bele responde situasaun emerjénsia tanba daudaun ne’e iha hela Zumalai nune’e xefe suku sira presiza halo levantamentu dadus kona-ba kondisaun estrada labele nonok de’it”, nia fó hanoin.
Bazeia ba dadus populasaun iha munisípiu Kovalima hamutuk 89, 461 kompostu husi mane 45,408 feto 44053 ho nia xefi família 22, 040 iha nia Postu administrativu Fatululik, Fatumea, Fohorem, Tilomar,Maukatar, no Zumalai.
Jornalista: Celestina Teles
Editór: Rafael Ximenes de A Belo
