VIKEKE, 03 Abríl 2025 (TATOLI)—Inan amán husi estudante sekundáriu jerál filial (SJF) suku Vessoru, postu Uatulari, munisípiu Vikeke husu Ministériu Edukasaun (ME) esplika kona-ba estatutu eskola sekundáriu jerál filiál Vessoru nian tanba to’o agora estudante na’in-38 diploma seidauk asina
Reprezentante inan-aman husi estudante SJF Vessoru, Elidio Amaral, haktuir estudante finalista husi tinan 2024 hamutuk na’in-38 to’o agora nia moris sai konfunzaun ba profesór SJF Vessoru sira, nune’e estudante finalista sira-nia diploma seidauk asina hodi difikulta estudante finalista sira asesu ba universidade.
“Tanba ne’e, ha’u nu’udár inan-aman sente triste tanba ami-nia oan sira-nia diploma to’o agora seidauk asina. Nune’e, ami ohin enkontru hamutuk ho profesór sira buka solusaun ba Sekundáriu Filál Vessoru tanba sekundáriu ida-ne’e ninia sentru mak sekundáriu ida-ne’ebé seidauk klaru, tanba ne’e mak seidauk asina ami-nia oan sira-nia diploma. Atu solusiona ami-nia preokupasaun ne’e, Ministériu Edukasaun mak bele fó solusaun. Ne’ebé, husu Minustériu mai esplika no deside estatutu eskola ida-ne’e nian, atu ami-nia oan sira-nia diploma bele asina,” nia hateten.
Nia husu Governu liliu Ministériu Edukasaun atu fó solusaun, nune’e estudante sira bele hetan diploma tanba hahú husi Janeiru agora tama ona Abríl ne’e, estudante sira seidauk simu sira-nia diploma to’o ohin loron.
Koordenadór sekundáriu jerál filiál Vessoru, Paulo Soares sa Silva, hateten kona-ba diploma estudante sira-nian agora sai preokupasaun mós ba profesór sira tanba inisiu establese Sekundáriu Jerál Filiál Vessoru hari’i iha tinan 2024 ne’ebé filiál ba Sekundáriu Daraloi, Iraler.
“Maibé, orientasaun servisu ida mai husi ME katak ami-nia eskola ida-ne’e filiál ba fali sekundáriu Sabika Besi Kulit, tanba ida-ne’e sai preokupasaun ba ami. Entaun eskola ne’e sé loos mak bele asina estudante sira-nia diploma, nune’e ami sei esforsu koordena ho ME hodi fó solusaun ba ami-nia preokupasaun ida-ne’e,” nia dehan.
Hatán preokupasaun ne’e, Diretór servisu edukasaun munisípiu Vikeke, Julio Sakadura, hateten SJF Vessoru ne’e iha despaixu klaru ona katak SJF filiál ba sekundáriu Sabika Besi Kulit, la’ós ba Sekundáriu Daraloi.
“Foin lalais ne’e, ha’u bolu ona koordenadór SJF Vessoru, hodi relata ba sira bazeia ba despaixu ne’ebé mai husi ME katak estudante finalista sira-nia diploma ne’e diretór sekundáriu Sabika Besi Kulit mak bele asina. Tanba Sekundáriu Daraloi ne’e estatutu filiál. Tan ne’e ha’u husu ba koordenadór SJF Vessoru kumpre orientasaun ka despaixu ME nian no ita labele kontra,” nia dehan.
Tuir dadus estudante finalista SJF Vessoru tinan 2024 hamutuk na’in-38, ne’ebé kompostu husi siénsia naturál na’in-21 no siénsia sosiál na’in-17.
Enkuantu dadus estudante sekundáriu jerál filál Vessoru tinan anu letivu 2025 hahú husi estudante klase 1 to’o klase 3 hamutuk na’in-83 no totál profesor hamutuk na’in-17, ne’ebé kompostu hudi profesór permanete na’in-hitu (7) no kazuál na’in-10.
Jornalista : Vitorino Lopes da Costa
Editór : Cancio Ximenes
