DILI, 03 Abríl 2025 (TATOLI)—Xefe Departamentu Imunizasaun Ministériu Saúde, Maria Angelina Pereira, rekoñese vasina sarampu no rubella estoke laiha hodi fó vasina ba labarik idade fulan sia iha Dili, maibé munisípiu iha.
“Vasina ba labarik ho idade fulan sia no tinan ida-fulan neen mak estoke mamuk iha Dili, maibé iha munisípiu balun estoke iha hela atu vasina ba labarik sira,” Maria Angelina Pereira informa ba TATOLI, iha nia kna’ar fatin, Ministériu Saúde (MS), Kaikoli, kinta ne’e.
Nia dehan, vasina ne’ebé mak agora daudaun laiha ne’e la signifika laiha hotu la’e, maibé iha balun mak stock out hanesan vasina rotavirus ka tau de’it ba labarik sira-nia ibun ne’e estoke iha nasional laiha, depois vasina Covid-19 ba labarik idade 12 ba leten, vasina tetanus ba inan isin-rua mós laiha.
“Vasina sarampu no rubella laiha hahú iha Janeiru ne’e kedas, maibé la’ós parte imunizasaun nonook de’it, más ami buka ona solusaun no prosesa ona bá parseiru sira-ne’ebé mak durante ne’e suporta hanesan UNICEF, OMS no NTAG, tan ne’e semana oin vasina sira-ne’e tama ona mai,” nia esplika.
Notísia relevante: Semana oin, vasina Sarampu ba labarik sei to’o iha Timor-Leste
Maria Angelina informa prosesu kompra ida-ne’e la’ós iha TL, maibé kompra iha rai-li’ur, entaun dalabarak sistema ne’e presiza han tempu fulan tolu ka fulan neen, tanba la’ós Governu TL nian mak utiliza vasina sira-ne’e, maibé nasaun sira seluk mós uza vasina referida.
“Vasina balun hanesan DPT (diphtheria-tetanus-pertussis) ne’e tama ona iha fulan-Marsu. Ida-ne’e ba labarik idade tinan ida-fulan neen. Espera iha loron 7 Abríl ne’e sei tama tan vasina sarampu no rubella.
Nia relata, vasina iha sentru saúde sira-ne’e la’ós dehan laiha hotu lae, maibé iha vasina balun mak laiha, maski nune’e pesoál saúde sira mós informa ona ba inan sira katak bainhira ai-moruk ne’e estoke iha fali sei informa ba inan sira atu lori filafali labarik sira mai vasina.
Antes ne’e, Diretór Aprovizionamentu Institutu Nasionál Farmaséutiku no Produtu Médiku (INFPM), Sergio da Costa Belo, hateten, semana oin, Fundu Nasaun Unida ba Labarik (UNICEF-sigla inglés) sei entrega vasina sarampu no rubella ba INFPM.
Jornalista: Felicidade Ximenes
Editór: Xisto Freitas da Piedade
