KOVALIMA, 03 Abríl 2025 (TATOLI) – Administradór postu administrativu Suai Munisípiu Kovalima foin konsentra implementa atividade sira hanesan reuniaun líder komunitária no Asembleia Postu Administrativu (ASPA).
Administradór postu administrativu Suai, Idelfonso Maria Amaral informa katak iha postu administrativu implementa atividade sira hanesa organiza reuniaun ASPA ne’ebé kada tinan hala’o dala rua no reuniaun líder komunitária.
“Ami-nia atividade asembleia postu no reuniaun líder komunitária ne’e de’it programa sira seluk iha aprovizionamentu tanba haree valór orsamentu boot liu nune’e tama iha sistema aprovizionamentu”, Autoridade postu Suai informa ba TATOLI, iha administrasaun postu Suai, ohin.
Administradór postu administrativu hala’o reuniaun Asembleia postu ne’e atu elobora proposta Planu Dezenvolvimentu Integradu Munisípiu (PDIM), Planu Asaun Anuál (PAA) no implementa Programa Nasionál Dezenvolvimentu Suku (PNDS) no reuniaun líder komunitária
Autoridade postu ne’e dehan katak, intensaun organiza reuniaun líder komunitária atu hala’o avaliasaun servisu membru konsellu suku ho diária no planu projetu PNDS hodi haree planu ne’e oinsá.
Implementasaun projetu PNDS haree ba setór sira importante hodi tau iha planu hanesan bee-moos, morru hala’u eskola balun seidauk iha atu haree iha razaun balun eskola rabat ho rai privadu nune’e iha problema disputa ruma ho nune’e balun seidauk; hahú koordena ho terra no propriedade atu buka solusaun.
Orsamentu atu organiza ba atividade iha postu administrativu ne’e hamutuk rihun rua-resin ne’ebé fahe ba hala’o reuniaun ASPA ne’ebé organiza tinan ida dala rua; kada fulan neen .
Bazeia ba dadus monografia Postu administrativu Suai, iha nia Suku Beko, Kamenasa, Debos, Labarai no Suai Loro ho nia aldeia 34. No, populasaun 29,525 ho totál xefe família 7504.
Jornalista: Celestina Teles
Editór: Rafael Ximenes de A. Belo
