DILI, 06 Outubru 2025 (TATOLI)-Deputada husi Partidu Demokrátiku (PD), Sancha Tilman, solisita ba Ministériu Obra Públika (MOP) atu tau verba iha proposta Orsamentu Jerál Estadu (OJE) 2026 ba manutensaun rotina ba estrada sira, nune’e redús kustu boot.
Nia dehan estrada nasionál, liuliu liga husi Sarlala bá Aileu, Same, Suai, Ainaru, ninia kondisaun di’ak, maibé nesesita duni atu halo manutensaun tanba kondisaun balun komesa aat daudaun ona.
“Aat hotu mak halo dala-ida ne’e nia gastu bele boot liu. Karik bele iha orsamentu [proposta OJE 2026] tau mós item ida ba manutensaun rotina”, nia sujere liuhusi reuniaun plenária Parlamentu, ohin.
Deputada ne’e mós agradese ba Governu tanba fó ona resposta ba ezijénsia povu iha postu administrativu Fohoren tanba konstrusaun komesa la’o no husu implementa ho kualidade.
Iha fatin hanesan deputadu husi Partidu Kongresu Nasionál Rekonstrusaun Timorense (CNRT), Gabriel Soares, apresia ba serbisu Governu tanba foin mandatu tinan rua halo dezenvolvimentu infraestrutura ida maka’as hanesan estrada, ponte no seluk tan.
Hodi dehan loron hirak liubá halo ona lansamentu ba obra ponte Welolo, estrada Luka, ne’ebé liga bá Natarbora-Manufahi. Aleinde ne’e, lansa mós ona reabilitasaun estrada iha Same no fatin seluk tan.
Deputadu CNRT, Marcos Xavier, kontinua ezije MOP, Komisaun Nasionál Aprovizionamentu atu aselera prosesu ba konstrusaun estrada Ermera, Glenu bá Atsabe. “Iha Lauana foin lalais karreta mós baku fila tan, [tanba] estrada [nia kondisaun] grave”, nia preokupa.
Deputadu CNRT, Mateus da Cruz, mós husu ba MOP atu tau atensaun ba projetu barak ne’ebé la’o iha territóriu no laiha kuadru avizu. Ezemplu mak obra konstrusaun estrada ida iha Bebonuk. “Lahatene projetu komesa bainhira, sé mak halo no orsamentu hira?”, nia kestiona.
Vise-Ministru ba Asuntu Parlamentár, Adérito Hugo, rejista preokupasaun sira ne’e no sei envia ba entidade tutela.
Jornalista: Nelson de Sousa
Editora: Maria Auxiliadora
