VIKEKE, 03 Abríl 2025 (TATOLI)—Koordenadór Ensinu Báziku Filiál Hau-Oli Vessoru, postu Uatulari, munisípiu Vikeke, Domingos Fernandes, informa EBF Hau-Oli 106 iha saladeaula aprendizajen tolu (3) kondisaun aat, nune’e iha tempu udan ne’e difikulta atividade ensinu aprendizajen tanba udan-been tama ba iha saladeaula nia laran.
“Ami-nia eskola ninia kondisaun saladeaula tolu mak ninia plafon dodok no balun monu hotu ona, inklui zinku maioria feruzen hotu no balu kuak no anin huu monu tiha ona. Nune’e, tempu udan, ami haruka estudante sira fila ba sira-nia uma, tanba iha saladeaula laran ne’e udan-been tama de’it, ne’ebé prosesu aprendizajen iha tempu udan labele la’o ho di’ak,” Domingos Fernandes hateten ba agência Tatoli iha suku Vessoru, ohin.
Kona-ba kondisaun eskola ne’e, nia dehan, nia parte aprezenta ona ba Ministériu Edukasaun (ME) hodi haree no tau iha planu konstrusaun atu labele difikulta tan prosesu ensinu aprendizajen loro-loron.
“Problema kondisaun saladeaula ne’e, ha’u hato’o tiha ona ba parte ministériu edukasaun. Iha tinan kotuk, tékniku husi miniesyériu edukasaun mai sukat ona maibé to’o agora seidauk mai implementa projetu konstrusaun. Ami la ezije Ministériu Edukasaun, karik iha orsamentu mai hadi’a ami-nia eskola atu ami bele uza hanorin ita-nia oan sira,” bia dehan.
Aleinde ne’e, nia dehan, EBF Hau-Oli menus fasilidade nobiliáriu eskoláe hansan meza no kadeira ba estudante sira menus tebe-tebes, entaunestudante sira dalaruma balun tuur de’it iha rai mak tuir prosesu aprendizajen.
“Ami-nia kadeira no meza iha eskola ne’e menus tebes. Kadeira no meza ida, estudante na’in-tolu (3) mak okupa. Dalaruma ita-nia estudante sira tuur hakerek mós difisil tebes. Kestaun sira-ne’e ami hato’o beibeik ona maibé laiha resposta to’o ohin loron,” nia relata.
EBF Hau-Oli Vessoru iha totál saladeaula hamutuk sia (9) no iha saldeaula hirak ne’e iha kondisaun saladeaula tolu (3) mak kondisaun aat no saladeaula neen (6) ne’e mak ninia kondisaun di’ak.
Tuir dadus, estudante EBF-Oli 106 Vessoru kompostu husi siklu 1, 2 no siklu 3 ho totál estudante na’in-314 no totál profesór hamutuk na’in-20.
Iha fatin seluk, diretór servisu edukasaun munisípiu Vikeke, Julio Sakadura, haktuir kona-ba kondisaun EBF Hau-Oli Vessoru aat ne’e, servisu edukasaun Vikeke aprezenta ona ba ministériu edukasaun hodi tau ba konsiderasaun.
“Kondisaun saladeaula EBF Ha’u-Oli Vessoru ami hato’o ona ba Ministériu Edukasaun sei tau planu implementasaun. Ne’ebé ita hein de’it, bainhira mak ministériu implementa,” nia hateten.
Jornalista : Vitorino Lopes da Costa
Editór : Cancio Ximenes
