BAUKAU, 02 Abríl 2025 (TATOLI)—Sekretariadu Tékniku Administrasaun Eleitorál (STAE) Munisípiu Baukau prodús ona kartaun biométriku ba eleitór sira hamutuk 11.133.
Diretór STAE Munisípiu Baukau, Natividade Freitas Guterres, esplika hafoin lansa iha Outubru 2024 to’o Marsu tinan ne’e, konsege prodús ona kartaun eleitorál Biométriku ba eleitór sira iha Munisípiu Baukau kompostu eleitór foun no tuan.
“Agora ita sei kontinua halo atendimentu maibé ema ladún barak ona tanba estoke kartaun hotu no sei iha faze produsaun,” Diretór STAE Baukau informa ba TATOLI iha ninia kna’ar fatin, Vila Nova, Baukau, kuarta ne’e.
Husi totál numéru ne’ebé mensionadu, eleitór rejistu foun hamutuk 1.137, enkuantu eleitór tuan ne’ebé atualiza dadus hamutuk 9.966.
Natividade Freitas salienta katak mezmu estoke kartaun laiha ona maibé prosesu atendimentu sei kontinua tanba sei atualiza iha sistema, enkuantu eleitór foun no eleitór tuan provizoriamente simu billete no sei troka ba kartaun foun iha Juñu.
“Sira-ne’e hotu votante ativa. Iha balun ne’ebé tinan 16 iha ona direitu hetan kartaun maski seidauk bele vota,” Natividade Freitas akresenta.
STAE Baukau planeia halo atendimentu iha kada postu maibé sei hein ekipamentu no halo rekrutamentu ba ofisiál tékniku operadór no tékniku IT ne’ebé prioridade ba eleitór ema ho defisiénsia no idozu invalidés iha área kada suku.
Entretantu, tuir dadus, totál eleitór iha Munisípiu Baukau atuál hamutuk 140.377 ne’ebé konsideradu sei provizóriu tanba iha faze resensiamentu ne’ebé husi dadus ne’e sei inklui eleitór falesidu no dupla kartaun.
Jornalista: Natalino Belo
Editór: Xisto Freitas da Piedade
