DILI, 04 Abríl 2025 (TATOLI) – Banku Mundial no Ministériu Obra Públika (MOP), liuhusi Unidade Jestaun Programa organiza semináriu kona-ba jestaun pedreira iha Timor-Leste atu haforsa seguransa no estabilidade operasaun pedreira ba tempu naruk no hasa’e koñesimentu kona-ba prátika operasaun minerasaun iha Timor Leste.
Reprezentante Banku Mundiál iha Timor-Leste, Bernard Harborne, hateten objetivu husi semináriu ne’e mak atu hamutuk ho Governu no parte relvante sira disemina informasaun atu hothotu iha koñesimentu oinsá atu utiliza pedreira ne’e ho di’ak hodi proteje ambiente, família liuliu oan sira husi risku ba konstrusaun pedreira sira.
“Ita ko’alia liu kona-ba oinsá ita jere protokolu ne’ebé ita utiliza atu foti materiál uza konstrusaun hanesan rai no fatuk ita bolu pedreira. Ita-nia terrenu rai ne’e rasik sai obstákulu ba ita-nia kompañia sira iha Timór, liuliu kompañia pedreira sira tanba haree iha tempu balun rai-maran tebes no balun udan. Ida-ne’e mak haree liu ba risku ne’ebé bele mosu”, Bernard Harborne hateten iha JL World, areia branka, Kristu Rei, Dili.
Banku Mundiál nia aprezentasaun ne’e atu serbisu hamutuk ho entidade relevante sira, hanesan Autoridade Nasionál Mineiru (ANM) no Autoridade Nasionál Lisensiamentu Ambientál (ANLA) ne’ebé fó lisensiamentu oinsá haree lala’ok ne’ebé di’ak hodi utiliza atu foti pedreira sira ne’e labele iha impaktu ba ambiente, nune’e mós ba saúde.
“Ha’u-nia esperansa iha workshop mak baibain ema sira ne’ebé laiha koñesimentu kona-ba operasaun sira ne’ebé husi pedreira sira ne’e, karik iha rai-rahun, rai-ku’ak ne’ebé ke’e husik hela tempu udan bee-nalihun fó risku ba ema. Ita hamutuk fó informasaun ba hotu bele hatene hadook-aan husi risku ba operasaun pedreira nian, tanba iha mákina boot, karreta boot sira tula rai, rai-rahun bele fó impaktu ba komunidade”, nia dehan
Iha fatin hanesan, Jestór Projetu Empréstimu Doasaun husi MOP, Amilcard da Costa Víctor, hateten atividade ne’e konvida entidade relevante sira hotu, nomós parseiru Banku Mundiál, empreza konsultór, kontratór atu iha koñesimentu di’ak kona-ba prosesu oinsá halo jestaun pedreira, regulamentu no lei ne’ebé vigora hela.
Nia esplika katak Parte Unidade Jestaun MOP nia serbisu ne’e foka liubá projetu ne’ebé iha akordu ba doasaun sira, implementasaun ba projetu hodi fó atensaun másima ba regulamentu sira atu empreza sira bele tau atensaun ba projetu ne’e ho seguru, ba nia ekipamentu, ambiente no seluk tan.
“Maski antes ne’e sira hetan ona informasaun, maibé liuhusi workshop sira ne’e bele hakle’an liután entidade relevante sira bele koñese malu di’ak”, nia haktuir.
Jornalista: Arminda Fonseca
Editora: Maria Auxiliadora
