VIKEKE, 04 Abríl 2025 (TATOLI)—Sekretáriu Konsellu Konsultivu Kombatente Libertasaun Nasionál (CCLN, sigla portugés), Mario Valdomiro de Jesus, informa provizoriamente estudante kombatente no martir libertasaun nia oan iha Vikeke hamutuk na’in-71 mak konkore ba vaga bolsa estudu ne’ebé Ministériu Asuntu Kombatente Libertasaun Nasionál (MAKLN) loke anu letivu 2025.
“Vaga bolsa estudu ba kombatente no martir sira nia oan agora daudaun ami sei simu dokumentu husi kandidatu sira. Vaga bolsa estudu ne’e hahú loke iha loron 24 fula-Marsu to’o mai ohin, ami rejista ona estudante kandidatu ne’e hamutuk na’in-71 submete ona sira nian dokumentu ba bolsa estudu tinan 2025 nian,” Mario Valdomiro de Jesus ba Tatoli iha nia kna’ar fatin Vikeke Vila, ohin.
Mario dehan, kada loron ekipa CCLN Vikeke simu estudante sira-nia dokumentu tanba vaga bolsa estudu ba munísipiu Vikeke hamutuk 100 ne’ebé Governu oferse ba kombatente no martir sira-nia oan.
“Vaga bolsa estudu ba kombatente no martir sira-nia oan kada munisípiu 100, ensinu báziku siklu 1 hamutuk na’in-(5), ensinu báziku siklu 2 to’o siklu 3 hamutuk na’in-15, ensinu superiór rai laran na’in-(50) no ensinu superiór rai liur na’in-lima (5). Ita-nia kombatente sira-nia oan mai rejistu hodi hetan bolsa estudu ne’e,” nia hateten.
Nia aprezenta, kritériu rejista ba bolsa estudu mak hanesan prienxe formuláriu bolsa estudu, kartaun eletorál kandidatu, Bilite Identidade (BI) husi kandidatu, sertidaun moris, matríkula eskolár tinan 2025, dokumentu eskolár tinan 2024 kaderneta eskolár no konta bankaria husi kandidatu.
Tanba ne’e, nia husu, kombatente no martir Vikeke oan aproveita konkorre ba vaga bolsa estudu ne’ebé MAKLN loke hodi resforsa estudu.
“Ida-ne’e sai hanesan oportunidade ba veteranu sira-nia oan ne’ebé agora sei hala’o estudu. Aproveita konkorre tanba agora ami sei simu dokumentu no sei taka iha loron 22 fulan-Abríl 2025,” nia dehan.
Tuir dadus, estudante ne’ebé daudaun ne’e konkorre ba vaga bolsa estudu hamutuk na’in-71 ne’ebé kompostu husi ensinu báziku siklu 1 na’in-ualu (8), ensinu báziku siklu 2 na’in-ualu (8), sekundáriu na’in-sia (9), universidade rai-laran na’in-44 no universidade rai-li’ur na’in-rua (2).
Entretantu, iha tinan 2023, veteranu Vikeke-oan na’in-271 maibé vaga ne’e presiza de’it 165, ne’ebé asesu ba universidade rai-laran 70, universidade rai-li’ur na’in-lima (5), sekundariu na’in-50 no segundu no terseiru siklu na’in-30, primeiru siklu na‘in-10.
Iha konkursu bolsa Estudu 2024 ba munisípiu Vikeke hamutuk 100 ba ensinu báziku vaga lima (5), segundu no terseiru siklu 15, sekundáriu 25, universidade rai laran na’in-50 no universidade rai liur na’in-lima (5).
Jornalista : Vitorino Lopes da Costa
Editór : Cancio Ximenes
