DILI, 04 Abríl 2025 (TATOLI)—Atu selebra Loron Mundiál Saúde, Ministériu Saúde hamutuk ho Organizasaun Mundiál Saúde(OMS) fó konsulta jerál ba komunidade iha Sede Suku Hera, Postu Administativu Kristu-Rei, Munisípiu Dili, sesta ne’e.
Diretora Jerál Kuidadu Saúde Primária Ministériu Saúde, Elisabeth Letomau, hateten atividade konsulta jerál ne’ebé mak hala’o iha Sede Suku Hera ne’e, liga ho Loron Mundiál Saúde ne’ebé mak monu iha 07 Abríl, tinan ne’e.
“Antes ita atu selebra Loron Mundiál Saúde, ita halo uluk atividade konsulta jerál iha Suku Hera, tanba programa integradu saúde ne’e ho objetivu atu hakbesik saúde bá komunidade tanba dalabarak komunidade iha área rurál bainhira moras la asesu ba fasilidade saúde,” Elisabeth informa ba TATOLI, iha Sede Suku Hera.
Dirijente ne’e haktuir katak konsulta saúde ne’e hala’o husi enfermeiru, parteira médiku jerál no mós espesialista Kubanu.
“Liga ho Loron Mundiál Saúde ne’e, ita halo de’it iha Hera, maibé ba programa integradu saúde ne’e la’ós iha-ne’e de’it, maibé bá munisípiu hotu-hotu,” nia esplika.
Elisabeth hatutan katak konsulta jerál ne’e ba labarik ki’ik, ema-boot sira, ne’ebé mak iha moras hanesan tensaun, fuan, matan, moras-laran, nehan, nune’e mós halo rastreiu ba kankru serviks liuliu ba inan-feton sira.
“Espesilista sira-ne’ebé mai fó tratamentu ne’e husi área oftamolojia, medisina interna, pediatria, dermatolojia no gatroenterolojia,” nia informa.
Iha fatin hanesan, pasiente Natalia Sasemau Barreto, kontente ho presenza médiku espesialista sira-ne’ebé mak mai direta hodi fó konsulta ba komunidade iha Hera.
“Ha’u sente kontente tebes, tanba primeiravéz ha’u bele konsulta hasoru direta espesialista sira hodi ha’u hato’o ha’u-nia moras ba, tanba durante ne’e ha’u moras ha’u konsulta de’it iha sentru saúde Hera ne’ebé atende husi enfermeiru sira. Maibé, ohin loron ha’u bele hasoru direta espesialista sira, tanba durante ne’e ha’u sofre moras estómagu no ohin espesialista sira fó ona ai-moruk. Ha’u espera hau-nia moras ne’e bele di’ak,” Natalia Sasemau afirma.
Aleinde ne’e, pasiente Elina de Jesus Alves, agradese ba parte Ministériu Saúde no Organizasaun Mundiál Saúde ne’ebé organiza atividade ida-ne’e hodi fó konsulta jerál ba komunidade.
Iha atividade ne’e marka presenza husi Reprezentante Organizasaun Mundiál Saúde, Arvind Mathur, Vise-Ministru Fortalesimentu Saúde, José Magno, Diretór Servisu Saúde Munisípiu Dili, Xefe Sentru Saúde Bekora, Xefe Sentru Saúde Formosa, Xefe Sentru Saúde Vera-Krúz inklui ekipa médika sira.
Jornalista: Felicidade Ximenes
Editór: Xisto Freitas da Piedade
