DILI, 05 Abríl 2025 (TATOLI) – Ministru Negósiu Estranjeiru no Kooperasaun, Bendito dos Santos Freitas, hala’o vizita kortejia ida iha Palásiu ba Páz hodi hasoru malu ho Primeiru-Ministru Reinu Kamboja, Samdech Moha Borvor Thipadei HUN Manet hodi ko’alia asuntu sira kooperasaun bilaterál entre nasan rua no mós adezaun Timor-Leste nian ba ASEAN.
Ministru Bendito informa Primeiru-Ministru Kamboja HUN Manet halo esforsu hotu no ko’alia ona ho Prezidente Repúblika Filipina, Marcos Junior atu fó apoiu ba Timor-Leste sai membru plenu ba ASEAN iha tinan 2025 ne’e iha Malázia.
“Durante konversa ho Primeiru-Ministru hato’o katak, Primeiru-Ministru halo esforsu hotu-hotu komunikasaun husi Estadu membru ASEAN sira seluk atu bele fó tulun ba Timor-Leste, liuliu Governu ho Filipina, Primeiru-Ministru, Hun Manet mós konversa ho Prezidente Filipina Marcos Junior atu bele tulun Timor-Leste nia adezaun ba ASEAN,” Ministru Bendito Freitas hateten liuhosi nota ne’ebé Agência TATOLI asesu husi media MNEK, ohin.
Ministru adianta, Xefe Governu Kamboja mós reafirma ofisialmente sira-nia prontidaun no konfiansa tomak ba Timor-Leste nia kandidatura atu sai membru ba dala-11 iha ASEAN liuhusi mekanizmu koordenasaun no kooperasaun bilateral nasaun rua nian.
Relasaun diplomátika entre Timor-Leste ho Kamboja konsideradu extraordinária tebes, la’ós de’it hosi estadu ho estadu, maibé mós entre líder ho líder ne’ebé demonstra liu hosi vizita Primeiru-Ministru, Kay Rala Xanana Gusmão ho Prezidente Repúblika, José Ramos-Horta ba Kamboja no mós vizita hosi eis Primeiru-Ministru Kamboja, HUN Sen ba Timor-Leste iha tinan 2016.
Tanba ne’e, Xefe Estadu, José Ramos-Horta mós hato’o ona konvite espesiál ba eis Primeiru-Ministru no atuál Prezidente Senadu Kamboja nian, HUN Sen hodi simu medallar Orden Kolar hosi Estadu Timor-Leste.
Iha okaziaun ne’e, Ministru Bendito Freitas entrega karta hosi Prezidente Repúblika, José Ramos-Horta nian ne’ebé espresa sentidu kondolénsia ba falesimentu Primeiru-Ministru Kamboja nia aman boot nian iha loron hirak liu-ba.
Vizita kortejia ne’e hala’o iha ámbitu vizita ofisiál dahuluk Ministru Bendito Freitas ba Kamboja ne’ebé akompañadu hosi Embaixadór Timor-Leste ba Reinu Kamboja, Ermenegildo Kupa Lopes, Diretór-Jerál ba Asuntu Bilaterál ba Ázia no Oseánia, Marcos da Costa no Terseira Sekretária, Laura Mizela da Costa.
Jornalista: Hortencio Sanchez
Editór: Florencio Miranda Ximenes
