DILI, 05 Abríl 2025 (TATOLI) – Mate-isin eis Embaixadora Vietname no Malázia, Maria Isabel Olandina Caeiro, to’o iha tuku 1:55 lokoraik ho voo Aero Dili A319, iha aeroportu Prezidente Nicolau Lobato, Komoro Dili, sábadu loraik.
Mate-isin ne’e simu husi Vise Ministra Asuntu ASEAN, Milena Rangel, Membru Parlamentu Nasional, FALINTIL-Forsa Defeza Timor-Leste, Provedoria Direitu Umanu no Justisa, Virgilio Guterres, grupu eskuteiru sira no família Saudozu.
Hafoin to’o, Saudoza nia mate-isin transporta ho Kareta Funeral F-FDTL ba nia hela fatin iha Bidau.
Embaixadór Timor-Leste nian iha Malázia, Lisual do Gaspar, hatete ona katak eis-embaixadora Vietname, Maria Olandina Isabel Caero Alves mate, iha tuku 12:09 oras lokál, ho tinan 69 iha ospitál Prince Court Medical Center iha Malázia.
Embaixadór ne’e garante, esforsu hela atu transfere embaixadór nia mate-isin mai Timor-Leste tuir prosedimentu Malázia nian.
Maria Olandina Isabel Caeiro Alves Alves moris iha Ermera iha loron 20 fulan Marsu tinan 1956. Nia servisu hanesan ativista, funsionariu publiku, negosiante no diplomata iha Vietname.
Nia involve iha organizasaun oin-oin hanesan prezidente Eskuteirus Timor-Leste, no ko-fundadora Organizasaun Feto Timor Kontra Violensia.
Nia servisu iha Rádiu Maubere iha tinan 1975. Nia hetan kapturasaun iha tinan hanesan no dadur iha Kupang-Indonézia no hetan livre iha tinan 1979. Maibé nia hetan torturasaun dala barak.
Olandina Cairo hala’o vida sivíl nu’udar inan mesak iha públiku nia matan durante períodu ne’e no serbisu nu’udar funsionáriu públiku iha administrasaun finanseira Indonézia Baucau nian to’o tinan 1989, nia kontinua ativu segredu iha rezisténsia Timór-Leste nian. Hafoin nia kapturasaun ikus iha tinan 1992, nia lakon nia serbisu no nia uma.
Jornalista: Hortencio Sanchez
Editór: Florencio Miranda Ximenes
