SEATOU husu autoridade kontrola jogu bola-gulin no kuru-kuru iha Vikeke
VIKEKE, 04 Abríl 2025 (TATOLI)- Sekretáriu Estadu Organizasaun Toponimia no Urbana (SETOU), Germano Santa Brites Dias, husu ba administradór postu lima iha Vikeke atu kontrolu jogu bola gulin no kuru-kuru sira-ne’ebé loke iha munisípiu referida.
“Iha Dili ami sobu ona jogu bola gulin no kuru-kuru sira ne’ebé loke iha estrada públiku. Iha tinan kotuk loron veteranu nian mak veteranu sira Vikeke hato’o pedidu ba ha’u atu sira loke bola gulin maibé pedidu ne’e ha’u la aseita hodi loke jogu. Tanba jogu ida-ne’e la fó benifísiu ba ita no lori ita ba problema, hanorin ita-nia oan sira la estuda no la eskola. Dala ruma inan-aman fó osan ba osan sira ba taka fali bola gulin”, Geramano Brites, hateten iha salaun administrasaun Vikeke, sesta (04/03).
Nune’e, Governante ne’e husu ba inan-aman veteranu sira labele kria jogu bola gulin tanba jogu sira-ne’e halo ema sai baruk ten.
“Tanba ne’e, ha’u husu ba Vikeke labele iha bola golin. Se Vikeke mak laiha bola golin ha’u husu agradese karik iha ha’u husu favor para. Enkuantu, manu-futu realiza iha sabádu no domingu bele realiza, maibé tenke dook husi eskola labele hanesan Dili nian joga to’o iha área eskola nian, Vikeke mak hanesan ne’e ita tenke sobu”, nia akresenta.
Nune’e nia husu, administradór Lakluta, Vikeke Vila, Ossú, Uatulari no Uatukarbau favor ida fó hanoin ba abitante sira labele loke bola gulin no kuru-kuru sira iha postu no Vila.
“Ha’u husu ba Administrador na’in lima favor kontrola jogu sira-ne’e no nafatin fó hanoin ba ita-nia komunidade sira iha postu atu labele loke jogu sira. Tanba jogu sira-ne’e dala ruma hamosu problema ne’ebé autoridade sira tenke kontrola. Ha’u husu autoridade sira labele sai opozisaun ba Governu”, nia hato’o.
Nune’e mós nia husu abitante sira tenke kumpre labele jogu sira-ne’ebé bandu atulabele hamosu problema sira.
Jornalista: Vitorino Lopes da Costa
Editór : Florencio Miranda Ximenes
