KOVALIMA, 06 Abríl 2025 (TATOLI) – Prezidente Autoridade Munisípiu Kovalima akompaña hosi Sekretáriu munisipál administrasaun no finansa, prezide Reuniaun Konsellu koordenasaun munisipál estraordinária atu diskuti no valida projetu Planu Dezenvolvimentu Integradu Munisipál (PDIM) ne’ebé sei implementa iha 2026.
Prezidente Autoridade Munisípiu Kovalima, Miguel Armada Cardoso informa, Reuniaun konsellu koordenasaun importante atu haree no diskuti no foti desizaun hamutuk ba proposta projetu PDIM 2026.
“Ami iha munisípiu Kovalima projetu 27 mai husi suku, hafoin iha Asembleia Postu Administrativu (ASPA) hafoin lori mai iha reuniaun konsellu koordenasaun munisipál halo ferramentu no matrix ne’ebé ohin halo ona validasaun”, Autoridade Kovalima, Miguel Armada Cardoso hateten ba jornalista, hafoin reuniaun KKM Kovalima, sesta ne’e.
Bazeia ba dadus proposta projetu PDIM husi Kovalima hamutuk 27, maibé liuhusi reuniaun deside projetu ualu mak sei fó prioridade iha 2026, tanba nia dezeñu no BoQ (Bill of Quantity – Konta kuantidade nian) kompletu ona hein atu submete ba iha nasionál hodi hetan aprovasaun.
Proposta Projetu PDIM ne’ebé mak munisípiu atu submete nasionál ba tinan-2026 ho nia estimasaun orsamentu hamutuk $ 2,016904.06 ne’ebé projetu neen nia dezeñu no BoQ iha ona rua mak dezeñu no BoQ la’o hela.
Proposta Projetu PDIM ualu ne’e mak ho naran projetu sira hanesan reabilitasaun estrada iha suku Maudemo, aldeia Besak oan, Postu administrativu Tilomar estimasaun orsamentu $ 371,994.33
Proposta projetu rekonstrusaun mini-merkadu iha Suku Fatululik, Postu administrativu Fatululik ho estimasaun orsamentu $ 74,719.97, reabilitasaun bee-moos iha aldeia Manulor, suku Holpilat, postu Maukatar estimasaun orsamentu $ 52,081.13
Aleinde ne’e, projetu reabilitasaun valeta merkadu Tabakolot iha mota Karau ulun, suku Kamenasa, postu Suai $ 137,503.58, konstrusaun kanál irrigasaun Tafara, suku Suai Loro, postu Suai $ 379,735.90, konstruisaun postu saúde no rezidénsia pesoál médiku iha suku Usekai, Zumalai nia dezeñu no BoQ iha ona.
Proposta projetu loke estrada foun ba Ula, suku Zulo, postu Zumalai $ 158,764.65 nia dezeñu no BoQ la’o hela no konstrusaun edifísiu no morru hale’u Dirasaun Munisípiu Transporte Komunikasaun iha suku Kamenasa, postu Suai $ 386,675.75 ne’ebé nia dezeñu no BoQ prosesu hela.
Jornalista: Celestina Teles
Editór: Rafael Ximenes de A. Belo
