DILI, 05 Abríl (TATOLI)-Tribunál Judisiál Primeira Instánsia Dili (TPJIPD),domingu ne’e, halo interrogatóriu dahuluk hodi aplika medida koasaun Prizaun preventiva ba suspeita feto ida husi nasaun Xina ho inisiál YH tanba komete kazu Droga.
Suspeita ne’e ekipa konjunta Autoridade Aduaneira (AA)/Alfándega no Polisia Nasionál Timor-Leste liuhusi Departamentu Investigasaun Kriminál Nasionál (DIKN) detein, iha loron sesta (04/4), tanba envolve krime tranzasaun droga husi Fransa mai Timor-Leste.
Juíz Francisco Cabral, nu’udar titular ba interrogatóriu dahuluk ba kazu droga ne’e hatun despaixu hodi aplika Prizaun Preventiva ba arguida YH.
Tanba iha audiénsia ne’e, Ministériu Públiku (MP) liuhusi Prokuradór Rogério Viegas akuza no promove aguida ho krime tráfiku ilísitu ba droga ne’ebé previstu no punidu iha lei númeru 2/2017, 25 Janeiru kona ba kombate tráfiku no konsumu ilísitu ba droga ne’ebé previstu iha artigu 7, kona ba tráfiku no atividade ilísitu husi aliña 2 ne’ebé hateten ema ne’ebé hetan autorizasaun maibé sakar buat ne’ebé hatur tiha no prátika subar-subar aktu ne’ebé temi iha númeru kotuk ba sei kastigu pena tinan 6 too 17.
Nune’e, Prokuradór husu ba Tribunál atu aplika medida koasaun Prizaun Prevetiva ba arguida YH tanba haree ba arguida nu’udar sidadaun estranjeira no atu asegura prosesu investigasaun ne’ebé sei hala’o husi Ministériu Públiku .
“Ministériu Públiku konsidera katak medida koasaun aplikada ne’e adekuadu atubele asegura ba investigasaun ne’e bele la’o di’ak nafatin”, hatete Prokuradór ne’e.
Defeza sei aprezenta rekursu
Entretantu, Defeza husi Arguida YH, Advogadu Privadu Januario Martins, konsidera medida koasaun Prizaun Preventiva ne’e kontraditóriu ho alegasaun husi Ministériu Públiku,nune’e kontesta hela desizaun ne’e hodi aprezenta fali rekursu.
Loloos, nia dehan Tribunál aplika de’it medida koasaun proibisaun auzénsia,tanba nia sidadaun estranjeira mak Tribunál foti nia pasaporte atu nia labele halo viajen ba estranjeiru durante kazu ne’e sei iha hela faze investigasaun nia laran.
Alende ne’e, nia dehan bele aplika mos medida koasaun seluk mak Aprezentasaun Periódika hodi fó biban ba autoridade seguransa bele kontrola sidadaun estrajeiru ne’e nia movimentu.
Ho desizaun ne’e, Advogadu Januario fundamenta sei halo rekursu hodi kontesta desizaun Tribunál Judisiál Primeira Instánsia Dili.
“Tanba tuir regra prosesuál iha loron 30 ba defeza atu aprezenta rekursu hodi kontesta ba Tribunál nia desizaun bainhira defeza haree no sente katak desizaun Tribunál aplikavel ba nia kliente la adekuadu”, Advogadu ne’e afirma.
Hafoin despaixu ikus husi Tribunál ba kazu ne’e, Advogadu Privadu Januario Martins no Olivio Barros ne’ebé fó asiténsia legál ba arguida YH la simu desizaun no sei hato’o rekursu hodi kontesta despaixu ne’ebé aplika Prizaun Prevetiva ba nia kliente YH.
Jornalista : Natalino Costa
Editór: Florencio Miranda Ximenes
