VIKEKE, 07 Abríl 2025 (TATOLI)—Adventist Development and Relief Agency (ADRA) Timor-Leste, segunda ne’e, lansa sentru produsaun mina-nuu inklui oferese formasaun ba membru kooperativa iha aldeia Sira-Lari, suku Karaubalu, postu Vikeke Vila, munisípiu Vikeke.
Atividade ne’e akompaña mós husi parseiru sira hanesan International Labour Oganizasaun (ILO), Ministériu Komérsiu Indústria (MKI) no Sekretaria Estadu Kooperativa (SEKoop) inklui Autoridde munisípiu Vikeke.
Diretora ADRA Timor-Leste, Virginia Pyecroft, hateten, instituisaun ne’e ninia papél mak hadi’a koñesimentu no abilidade kooperativa sira ne’ebé eziste iha Vikeke, liuliu ba produtu nuu. Objetivu husi atividade ne’e mak atu introdús projetu abilidade agrofloresta ne’ebé foka ba kadeia valór nuu hodi halo produtu ne’ebé ho valór a’as no komunidade bele asesu di’ak ba merkadu.
“Daudaun ne’e ami-nia parseiru sira no kooperativa hahú ona prosesamentu mina-nuu. Liuhusi projetu abilidade agrofloresta ne’ebé hetan apoi husi Uniaun Europeia, ami sei haree filafali kooperativa sira ne’ebé prodús mina-nuu bele sai produtu seluk, hanesan nuu bele prodús ba nuu-u’ut, adubu no sira seluk tán. Garante katak kooperativa sira-ne’e sei kontinua haboot sira-nia kooperativa,” Virginia Pyecroft, hateten durante serimónia lansamentu sentru produsaun nuu.
Notísia relevante : KHK no CRS apoia mákina prosesa mina-nuu ba grupu ualu iha Uma-Uain Leten Viqueque
Diretora dehan, sentru ida-ne’e sai hanesan espasu ba formadór sira hodi hanorin membru kooperativa sira.
Nia iha espetativa, bainhira kooperativa sira forte, maka komunidade sei forte no nasaun mós sei forte.
Iha fatin hanesan, Diretór Jerál MKI, Martins Magno, agradese ba ADRA ne’ebé fó ona apoiu ba grupu indústria ki’ik sira-ne’ebé mak atu valoriza produtu nuu.
“Parte Ministériu Komérsiu no Indústria agora atu iha planu diversifika ita-nia produtu nu’u sai valór ekonomia hodi kompete iha merkadu, nuu bele sai produtu seluk. Ami mós halo
kapasitasaun kona-ba produsaun mina-nuu. Ita mós tenke valoriza produtu rai-laran sira-ne’ebé iha,” nia katak.
Nune’e mós, Sekretáriu Asuntu Sosiál no Organizasaun Komunitária munisípiu Vikeke, Acâcio de Sousa, haktuir, prezensa ADRA iha munisípiu ne’e konsege forma komunidade kria kooperativa no balun prodús mina-nuu ho finalidade fó vantajen di’ak ba munisípiu ida-ne’e no komunidade lokál.
“Prezensa ADRA atu fó formasaun no motiva komunidade prodús mina-nuu. Tanba ne’e, ha’u husu komunidade nafatin partisipa másimu iha atividade ne’e, liuliu ba produsaun mina-nuu hodi hadi’a ekonomia rai-laran,” nia hato’o.
Reprezentante Administrasaun Vikeke ne’e husu atu atividade ne’e bele iha kontinuasaun.
ADRA sei fó formasaun kona-ba produsaun mina-nuu no virgin coconut oil, kapaxu feitu husi nuu nia fibra, vazu ho nuu kulit, adubu, no hahán ba animál.
Formasaun sei oferese ba membru kooperativa neen, ne’ebé kada kooperativa sei reprezenta husi ema na’in-ida.
Jornalista : Vitorino Lopes da Costa
Editora : Julia Chatarina
