KOVALIMA, 07 Abríl 2025 (TATOLI) – Espasu semitériu públiku (SP), ne’ebé lokaliza, iha Aldeia Loro, Suku Suai Loro, Postu administrativu Suai, Munisípiu Kovalima, la sufisente ona atu haloot mate-isin ka kadáver sira.
Xefe Suku Suai Loro, Manuel Gomes da Costa, informa, lideransa lokál iha nia mandatu fó prioridade hodi buka meiu kona-ba atu buka rezolve semitériu públiku Suai Loro ne’ebé la iha ona espasu atu haloot kadáver komunidade nian bainhira lakon vida.
“Ha’u hanesan xefe suku buka meiu realiza ona enkontru ho komunidade. Sira aseita atu fó sira-nia kontribuisaun maibé realidade daudaun ne’e komunidade balun de’it mak foin fó sira-nia kontribuisaun no balun seidauk”, Manuel Gomes da Costa, haktuir ba jornalista, iha Sede suku Suai Loro, ohin.
Rezultadu kontribuisaun husi komunidade Suai Loro hamutuk rihun $ 3-resin ona maibé seidauk sufisente tanba kustu atu sosa rai la sufisente tanba rai daudaun nia folin rihun $ 20-balun liu.
Iha momentu ne’e deside kada xefe família atu kontribui osan $ 30 ne’e sufisente ona atu sosa rai no konstrui uma ba Aman Maromak (Pai Nosso), iha semitériu ho intensaun família mate-isin tau iha kaixaun ki’ik hodi rai iha uma ne’e.
Maske líder suku iha ona planu maibé komunidade sira seidauk iha konsiénsia atu kontribui osan atu buka meiu sosa rai nune’e bainhira komunidade sira mate bele haloot iha rai referidu, tanba semitériu públiku daudaun ne’e espasu la sufisente ona.
Durante ne’e semitériu públiku Suai Loro haloot kadáver husi aldeia sira hanesan Aldeia Loro, Loo no Mane-ikun. Espasu la to’o ona atu haloot kadáver sira bainhira sidadaun sira iis lakon husi isin-lolon.
Xefe suku mós rekoñese katak nia parte seidauk submete proposta ba autoridade postu no munisípiu maibé iha ona planu atu submete nune’e bele buka solusaun.
Suku Suai Loro iha nia aldeia sira hanesan, Loro, Mane-ikun, Loo, Suka bilaran no Akar laran ho totál populasaun hamutuk 4,763 kompostu husi mane 2,41 , feto 2,332 ho totál uma-kain 1,271.
Iha sorin seluk, Administradór postu administrativu Suai, Idelfonso Maria Amaral esplika, kona-ba espasu semitériu públiku iha Suai Loro ne’ebé insufisiente ona hanesan líder postu seidauk simu proposta husi xefe suku Suai Loro.
“Ami autoridade postu hein de’it proposta husi suku nune’e autoridade postu bele submete relatóriu ba prezidente autoridade nune’e bele prevee orsamentu. Bainhira seidauk simu relatóriu oinsá?”, nia dehan.
Jornalista: Celestina Teles
Editór: Rafael Ximenes de A. Belo
