DILI, 07 Abríl 2025 (TATOLI)—Diretora Servisu Administrasaun Finansa no Lojístika Hospital Nacional Guido Valadares (HNGV), Sara Maria Xavier, hateten husi Janeiru to’o Marsu HNGV hatama reseita ba kofre Estadu hamutuk $96.240,76.
“Iha trimestre dahuluk, ita hatama reseita ba kofre Estadu hamutuk $96.240,76. Husi ne’e, pasiente estrajeiru ne’ebé konsulta iha HNGV hamutuk 303 ho valór $21.654,07 no pasiente lokál ne’ebé halo tratamentu iha VIP hamutuk 2.340 ho valór $74.586,69,” Sara Maria Xavier dehan iha nia kan’ar fatin HNGV,ohin.
Nia haktuir, hosi númeru ne’e, totál pasiente ne’ebé halo tratamentu liuhosi selu iha HNGV hamutuk 2.643 ho rendimentu hamutuk $96.240,76.
“Orsamentu husi tratamentu ba pasiente selu durante Janeiru hamutuk $32.808,25. Husi ne’e, pasiente hamutuk 283, kompostu husi pasiente estranjeiru 123 ho rendimentu $8.585,58 no pasiente lokál hamutuk 160 ho rendimentu $24.222,67,” nia dehan.
Nia hatutan katak rendimentu husi Fevereiru hamutuk $31.596,65 ho totál pasiente hamutuk 1.153, kompostu husi pasiente estranjeiru hamutuk 104 ho rendimentu $6.467,90 no pasiente lokál hamutuk 1.049 ho rendimentu orsamentu $25.128,75.
“Ba rendimentu Marsu nian, montante rendimentu $31.835,86 ho totál pasiente hamutuk 1.207. Husi númeru ne’e, pasiente na’in 76 mak sidadaun estranjeiru ho rendimentu orsamentu $6,600.59. Enkuantu, pasiente lokál hamutuk 1.131 ho orsamentu $25.235,27,” nia informa.
Dirijente ne’e hatutan, pasiente estranjeiru ne’ebé hetan tratamentu iha HNGV tenke selu mak hanesan hela iha VIP, check-up, inklui operasaun. Aleinde ne’e, pasiente lokál ne’ebé hetan tratamentu tenke selu tanba utiliza sala VIP.
Jornalista: Felicidade Ximenes
Editór: Xisto Freitas da Piedade
