DILI, 07 Abríl 2025 (TATOLI)—Diretora Adminsitrasaun Finansa no Lojístika iha Hospital Nacional Guido Valadares (HNGV), Sara Maria Xavier, hateten husi Janeiru to’o Marsu, HNGV ezekuta ona orsamentu jerál Estadu (OJE) 2025 ho montante $2.447,697,93, ekivale ho 21%.
Orsamentu jerál Estadu 2025 ne’ebé aloka ba Hospital Nacional Guido Valadares (HNGV), hamutuk $14.855,924,00 ne’ebé fahe ba kategoria Saláriu no vensimentu, Bens no Servisu, Kapitál Menór no Kapitál Dezenvolvimentu.
“Trimestre dahuluk ne’e ita atinje oan 21% ne’ebé kompostu husi ezekusaun 16%, obrigasaun 1% no kompromisu 4%,” Sara Maria Xavier hateten ba TATOLI iha nia kna’ar fatin, HNGV, Bidau, segunda ne’e.
Nia dehan, verba Kapitál Menór sei iha prosesu aprovizionamentu atu sosa ekipamentu médiku sira hanesan mákina Raiu-X, mákina laboratóriu, ekipamentu ba ortopedia, ekipamentu matan, ekipamentu onkolojia, ekipamentu kardiolojia, ekipamentu nehan, ekipamentu sala operasaun, mákina anestesia no mós sei kompra kama ne’ebé atu responde ba pediatria andár lima ne’ebé mak iha tinan ida-ne’e projetu refere atu entrega.
Dirijente ne’e haktuir, ba verba Kapitál Dezenvolvimentu, sei loke aprovizionamentu hodi loke tan sala ICU (Intensive Care Unit) no sosa kama ICU nian, tanba daudaun ne’e kama ICU neen de’it, labele responde ba populasaun Timor laran tomak, entaun presiza loke tan espasu ICU hodi responde ba kazu sira-ne’ebé mak grave.
“Tinan ida-ne’e ita ezekuta no halo prosesu aprovizionamentu, tanba dalaruma iha tempu badak anúnsiu ba públiku kona-ba projetu ne’ebé ligadu ho verba Kapitál Dezenvolvimentu,” nia afirma.
Entretantu, tuir dadus iha portál transparénsia ne’ebé ajénsia TATOLI asesu, husi Janeiru to’o Marsu, husi orsamentu alokadu hamutuk $14.855,924,00 ne’e, ezekusaun atinje ona 16% ekivale ho orsamentu ba kompromisu sira $423.857,15, obrigasaun sira $21.935,52, atuál $2.360,760,43 no saldu $12,049,370.90.
Jornalista: Felicidade Ximenes
Editór: Xisto Freitas da Piedade
