Janeiru-Marsu, HNGV rejista bebé mate iha inan nia kabun-laran hamutuk 52
DILI, 08 Abríl 2025 (TATOLI)—Xefe Departamentu Maternidade Hospital Nacional Guido Valadares (HNGV), Zinia Mascarinhas, hateten durante fulan-Janeiru to’o Marsu, tinan ne’e, HNGV rejista bebé mate iha inan nia kabun-laran hamutuk 52, entretantu inan ne’ebé mak partu iha sala maternidade hamutuk 1.554 (partu normál 1.014, sezariana 372 no vacum 131).
Nia hatutan, bebé moris ho pezu normál durante fulan tolu hamutuk 1.247, bebé moris ho pezu la normál hamutuk 228, bebé ne’ebé moris kaduak hamutuk 25 no bebé ne’ebé moris ho mál pozisaun hamutuk 38.
“Bebé sira-ne’ebé mak moris iha maternidade HNGV durante fulan tolu, mane hamutuk 817 no feto hamutuk 737 no bebé mate iha inan nia kabun-laran hamutuk 52,” Zinia Mascarinhas dehan iha nia kna’ar fatin, HNGV, Bidau, tersa ne’e.
Nia haktuir, bebé sira-ne’ebé mak mate iha inan nia kabun-laran ne’e, kauza husi inan sira mai ho infesaun no mós sira durante isin-rua ladún fó importánsia bá halo tratamentu saúde iha fasilidade saúde sira-ne’ebé besik, no inan sira-ne’ebé mak hetan moras antes ne’e hanesan ipertensaun krónika, pre-eclampsia no raan-midar.
“Inan sira-ne’ebé mak partu iha HNGV, durante fulan tolu maioria maihusi Munisípiu Dili, tanba sira hatene katak HNGV ne’e hanesan topu referénsia, entaun sira hakarak mai partu iha-ne’e, maski sentru saúde iha Dili laran ne’e iha,” nia afirma.
Zinia informa katak husi fulan tolu ne’e inan ne’ebé mate iha maternidade HNGV hamutuk na’in-haat tanba kauza husi moras komplikasaun sira-ne’ebé mak sira hetan.
Nia hatutan, husi Departamentu Obsterisia no Gynecolojia iha médiku espesialista na’in-ualu kompostu husi timoroan na’in-lima, kubanu rua no xineza ida. Enkuantu, médiku jerál hamutuk 17 no mós parteira sira hamutuk 40-resin. Nune’e, kama ba maternidade hamutuk 38.
Jornalista: Felicidade Ximenes
Editór: Xisto Freitas da Piedade
