KOVALIMA, 08 Abríl 2025 (TATOLI) – Ministériu, Komérsiu no Indústria (MCI) liuhusi Dirasaun nasionál komérsiu internu, partilla esperénsia kona-ba jestaun estratéjia ba vendedór sira, iha munisípiu Kovalima.
Atividade formasaun ne’e hala’o durante loron haat; hahú iha loron 08 to’o loron 11 Abríl ho nia tema Kapasitasaun vendedór kona-ba jestaun estratéjia negósiu. Mai ita hasa’e koñesementu hodi bele dezenvolve liután ita-nia ekonomia rai laran.
“Ministériu Komérsiu no Indústria ( MCI) liuhusi diresaun nia programa fasilita formasaun ba vendedór sira ne’ebé mak hanesan halo negósiu iha merkadu no loke kioske sira”, Diretór Jerál MCI , Nelito Lima de Araújo , dehan ba jornalista , iha edifísiu IADE Kovalima, ohin.
Atividade formasaun ne’e ba vendedór sira ne’e, MCI la’ós mesak, maibé MCI servisu hamutuk ho parseiru UN Woman nune’e oinsá vendedór sira bele iha koñesementu kona-ba jestaun sira; osan atu labele gasta hotu maibé balun rai ba sira-nia nogósiu balun uza ba nesesidade sira seluk.
Atividade formasaun ba vendedór sira ne’e hala’o no implementa bazeia ba programa husi MCI ne’ebé trasa ona tanba MCI iha dirasaun liga ba jestaun merkadu no servisu hamutuk ho Ministériu Administrasaun Estatál (MAE) oinsá atu haree vendedór sira halo atividade negósiu iha merkadu nune’e mós iha li’ur.
Formasaun ne’e MCI hala’o ona iha munisípiu sira hanesan Ermera, Baukau, Bobonaro, Vikeke no fatin seluktan, ne’ebé ohin fasilita formasaun konsentra iha munisípiu Kovalima.
Reprezentante Prezidente Autoridade Munisípiu Kovalima, Filomeno Cardoso hato’o agradesimentu ba MCI tanba iha hanoin atu fasilita formasaun referida.
“Ha’u, vendedór sira la’ós seidauk iha koñesementu kona-ba negósiu, tanba ho kapasitasaun ida-ne’e atu ita-nia vendedór sira atu hadi’a di’ak liu oinsá estratéjia bele dada konsumidór sira atu sosa sasan iha markadu no negósiu kiik sira”, Autoridade fó hanoin.
Bazeia ba autoridade Kovalima nia observasaun, durante ne’e vendedór sira iha merkadu atende konsumidór sira ho di’ak. Tanba ne’e, ho formasaun ida-ne’e bele iha mós oportunidade ba vendedór sira bele fahe esperénsia ba malu.
Vendedór Mafalda Cardoso, Governu nia programa ida-ne’e fó oportunidade ba vendedór iha merkadu no loke kioske sira seidauk iha koñesementu di’ak kona-ba jestaun estratéjia.
“Programa fasilita formasaun ida-ne’e hanesan fó oportunidade ba ami emprezáriu no negósiu ki’ik durante ami-nia kapasidade seidauk to’o, ho programa Governu ida-ne’e iha oportunidade oinsá atu hasa’e ami-nia koñesementu”, nia informa.
Realidade, tuir nia, hatudu katak vendedór sira iha merkadu no loke kioske sira balun menus iha koñesementu kona-ba jestaun estratéjia tanba ne’e atividade formasaun ida-ne’e importante nune’e bele iha ona koñesementu di’ak.
Jornalista: Celestina Teles
Editór: Rafael Ximenes de A. Belo
