DILI, 07 Abríl 2025 (TATOLI)—Diretór Tránzitu Seguransa Rodoviária Nasionál (DTSRN), Superintendente Asistente Polísia Luís da Costa, hateten DTSRN hamutuk ho Diresaun Nasionál Transporte Terrestre (DNTT), segunda ne’e, hahú halo ezekusaun ba abuzu ne’ebé iha sesta (4/4) liubá fó-sai katak karreta no motorizada estasiona liu minutu lima ekipa sei foti no sei aplika koima ho osan $45.
Nune’e, Diresaun Tránzitu Seguransa Rodoviária Nasionál hamutuk ho Diresaun Nasionál Transporte Terrestre hahú halo kontrolu bá viatura sira-ne’ebé para iha dalan ninin liu minutu lima hahú husi diresaun rotunda Estátua Prezidente Nicolau Lobato to’o Ponte BJ Habibie, Bidau. Iha operasaun ne’e, ekipa Diresaun Tránzitu Seguransa Rodoviária Nasionál konsege halo apreensaun ba karreta ho marka Suzuki Carry ne’ebé mak estasiona iha arredór Palácio do Governo nian oin, durante oras ida nia laran.
Diretór Diresaun Tránzitu Seguransa Rodaviariu Nasionál, Superintendente Asistente Polísia, Luís da Costa, haklaken iha loron hirak liubá Diresaun Tránzitu hamutuk ho Diresaun Nasionál Transporte Terrestre hasai avizu ida atu kontrolu veíkulu sira-ne’ebé para arbiru iha estrada nune’e hamosu engarrafamentu, tanba ne’e ohin halo ezekusaun ba avizu ne’e.
“Ohin ita hahú implementa avizu ba estrada sira diresaun husi rotunda Nicolau Lobato to’o ponte BJ Habibie husi estrada esquerda no direita. Hahú husi ema baibain no servidór Estadu no negosiante sira atu labele para kareta liu minutu lima,” Luís da Costa informa ba jornalista sira iha nia kna’ar fatin, Komandu Jerál Polísia Nasionál Timor-Leste (PNTL), Kaikoli, segunda ne’e.
Nia dehan, ba ema hirak ne’ebé la kumpri mak polísia tránzitu sei halo apreensaun ba sira-nia viatura.
“Bainhira parajen karreta ka motór la tuir avizu ne’ebé mak iha, tránzitu sei halo apreensaun no selu koima tuir Lei Kódigu Estrada númeru 6/ 2003 iha artigu 4 ne’ebé mensiona katak bainhira la kumpri órden autoridade, sei multa másimu $45,” nia esplika.
Iha biban ne’e, Superintendente Asistente Polísia, Luís da Costa, tenik karreta balun ne’ebé mak husi foho mai Dili mak lahatene regra hodi estasiona kle’ur liu minutu lima, entaun selu koima $60.
Jornalista: Natalino Costa
Esditór: Xisto Freitas da Piedade
