DILI, 08 Abríl 2025 (TATOLI)- Autoridade munisípiu Dili (AMD), iha trimestrál dahuluk – Janeiru, Fevereiru no Marsu, 2025, arrekada reseita besik rihun $3 ba kofre Estadu liuhusi publisidade no estasionamentu, Prezidente autoridade interinu Munisipál Dili, António Agosto Guterres, relata ba jornalista TATOLI, iha edifísiu TATOLI, Farol, Dili, tersa ne’e.
“Maibé kona-ba estasionamentu tanba foin daudauk paradu ita kontratu iha fulan-Marsu, sira bele hala’o hikas fila-fali funsionamentu, tanba livru sira-ne’ebé sira uza ba reseita nian ne’e, foin mak produs,” nia informa.
“Estasionamentu funsionáriu ita rekruta purvolta lima-nulu liu mak sei halo funsionamentu, no seidauk entrega ba kompaña. Iha futuru, ita haree maka posibilidade boot ona maka kompaña mak sei kaer. Agora daudaun sei iha hela funsionáriu kontratadu lima nolu mak sei hala’o” nia hatutan.
Tanba ne’e, Prezidente Autoridade Munispál Dili, apresia no agradese Polísia Nasionál Timor-Leste (PNTL) liuliu ba Diresaun Tranzitu Nasionál sira ne’ebé halo ona apelu katak hahú husi rotunda Nicolau Lobatu Komoro, ba to’o iha diresaun ponte BJ. Habibie, karreta no motor labele para iha dalan-ninin.
“Ha’u konkorda ne’e. Ha’u mós identifika karreta ida-ne’ebé mak loron tomak nia para iha espasu públiku, nia na’in laiha”, nia hateten.
Iha sorin seluk, tuir Sekretáriu asuntu sosiál no organizasaun munisípiu Díli (SECAM, AS), Tomas Barros, kuadru ba publisidade ne’e rasik iha folin ne’ebé mak lahanesan, no sempre iha ninia determinasaun loron publisidade bazeia na montante ne’ebé mak hakarak halo publisidade iha fatin púliku, maibé presu ba Governu no empreza sira hanesan de’it.
Sekretáriu ne’e informa, maneira kobransa husi publisitária ne’e la’ós entrega osan direta mai iha autoridade munisípiu Dili, maibé sei selu diretamente iha banku, hafoin ne’e mak sei entrega resibu ba AMD hodi autoriza halo publisidade ba kuadru banner iha fatin públiku.
“Buat hotu iha ninia regra rasik. Buat hotu la’o tuir ninia prosedur”, nia akresenta.
Iha biban ne’e, Sekretáriu Tomas Barros informa katak daudaun ne’e parte Autoridade Munisipál Dili, orienta daudaun ona Diresaun obra públika autoridade munisipál Dili nian no mós jestaun merkadu inklui saneamentu bele fihir daudaun ona fatin ne’ebé mak engarrafamentu boot koopera ho PNTL para minimiza engarafamentu.
Jornalista: Alexandra da Costa
Editór: Rafael Ximenes de A. Belo
