DILI, 08 Abríl 2025 (TATOLI) – Prezidente Repúblika, José Ramos Horta, simu karta kredensiál husi embaixador India, Kumar Ghildiyal, hodi hala’o enkontru kortezia iha salaun enkontru, Palásiu Prezidensiál, Bairru-Pité, Dili, ohin, ho objetivu hametin relasaun bilaterál entre nasaun rua – Índia ho Timor-Leste (TL).
“Ho haksolok, ha’u boas-vindas ba Embaixadór Ghildiyal nu’udar reprezentante Índia nian mai Timor-Leste,” PR Horta deklara iha nia diskursu.
Autoridade másima Estadu TL ne’e konsidera, ligasaun Dili ho Delhi (Nova Delhi – Kapitál India) importante tebes ba dezenvolvimentu no integrasaun rejionál nasaun nian.
“Ha’u fiar katak iha Embaixadór Ghildiyal nia lideransa, lasu amizade no kooperasaun entre ita-nia nasaun sei atinji nível foun ne’ebé fó benefísiu ba ita-nia povu sira”, nia hateten.
Xefe Estadu mós fiar katak nomeasaun Embaixadór Kumar Ghildiyal, sei eleva no hametin liután lasu amizade no kooperasaun entre nasaun rua, halo ligasaun Dili-Delhi sai metin liután.
Iha fatin hanesan, Ministru Negósiu Estranjeiru no Kooperasaun, Bendito Freitas, hateten, ofisialmente, Prezidente repúblika simu karta kredensiál husi Embaixadór Índia nian mai Timor-Leste, ne’ebé ofisialmente, reprezenta ona xefe misaun diplomátika Índia nian mai nasaun ne’e.
“Ida-ne’e hanesan kumprimentu ba promesa ne’ebé que hato’o husi Prezidente Índia nian, maka hodi iha siméria Ázia nian iha Jakarta, ne’ebé promote katak, sei loke embaixada iha Índia nian iha Timor-Leste”, Ministru ne’e informa.
Tuir governante ne’e katak ho entrega kredensiál ne’e, fó tan konfiansa, garantia ba kooperasaun parseria estratéjika entre Timor-Leste ho Índia.
“Ida-ne’e mak ohin lorokraik ne’e, embaixadór Índia fó ona karta kredensiál no ita-nia Prezidente simu ona. Espera katak ba oin, Prezidente mós promete atu fó apoiu másimu ba Embaixadór Índia nia servisu iha Timor-Leste”, autoridade ne’e haktuir.
Membru governu ho portefóliu ba asuntu estranjeiru no kooperasaun ne’e konsidera, Índia país ne’ebé potensiál tebes ba teknolojia, medisina, farmasente, inovasaun no agrikultura no buat barak tan. “Tanba ida-ne’e mak ha’u hanoin importante tebe-tebes, ho abertura ofisiál embaixada Índia iha Timor-Leste,” nia dehan.
Daudaun ne’e, tuir Ministru Bendito Freitas, Timor-Leste hahú ona loke nia embaixada Timor-Leste-Índia, ne’ebé lidera husi Embaixadór Timor-Leste iha Índia, Francisco Mau-Kura, hodi halo instalasaun embaixada TL iha nasaun referidu.
“Ho ida-ne’e garante ita-nia kooperasaun bilaterál, hodi haforsa lasu kooperasaun entre país rua ne’e – Timor-Leste ho Índia”, ministru realsa.
Entretantu, Timor-Leste estabelese ni embaixada iha Nova Delhi, Índia, iha fulan-Outobru tinan-2024 no India mós loke nia embaixada iha Dili, iha fulan-Setembru 2024, hatudu kompromisu ba malu atu hametin liután relasaun bilaterál no apoia Timor-Leste nia envolvementu ho organizasaun rejionál –ASEAN.
Jornalista: Alexandra da Costa
Editór: Rafael Ximenes de A. Belo
