DILI, 09 Abríl 2025 (TATOLI) – Ministru Administrasaun Estatál, Tomás do Rosário Cabral, aprezenta projetu dekretu Governu, ne’ebé regula serimónia hasa’e no hatún Bandeira Nasionál iha serimónia ofisiál komemorativa sira ba proklamasaun no restaurasaun independénsia nasionál.
Dekretu Governu ne’ebé aprova iha reuniaun Konsellu Ministru ne’e mai ho intesaun atu estabelese sistematikamente norma sira ba serimónia hasa’e no hatún bandeira nasionál, hodi garante ninia ezekusaun ho dignidade, rigór no uniformidade, durante serimónia ba proklamasaun independénsia iha loron 28 Novembru 1975, no restaurasaun independénsia iha 20 Maiu 2002.
Tomás Cabral dehan dekretu ne’e kria Korpu Hasa’e Bandeira Nasionál (CIBN,sigla portugés), ne’ebé kompostu hosi estudante ensinu sekundáriu, feto no mane, ne’ebé sei responsavel ba ezekusaun téknika no simbólika hosi aktu hirak-ne’e.
Define mós regras atu hala’o serimónia sira, estabelese kritériu ba selesaun membru CIBN nian, determina insentivu finanseiru ba partisipante sira no espesífika protokolu ne’ebé atu tuir durante hasa’e no hatún bandeira nasionál.
Jornalista: Arminda Fonseca
Editora: Maria Auxiliadora
