KOVALIMA, 09 Abríl 2025 (TATOLI) – Ministériu Dezenvolvimentu Rurál no Abitasaun Komunitária (MDRAK) serbisu hamutuk ho Organizasaun Internasionál PLAN fasilita formasaun ba estrutura Sentru Dezenvolvimentu Aldeia (SDA) no benefisiáriu grupu alvu ba implementasaun programa reabitalizasaun komunitária, iha munisípiu Kovalima.
“Ita fasilita formasaun ho nia klasifikasaun formasaun espesífiku no formasaun jenériku ne’ebé partisipa husi membru Sentru Dezenvolvimentu Aldeia (SDA) inklui membru benefisiáriu hodi fasilita formasaun”, Diretór Jerál Dezenvolvimentu Rurál, Filipe Cardoso, dehan ba jornalista sira iha salaun CNE Kovalima Tabakolot, ohin.
Atividade formasaun ne’e, formadór husi Plan Internasionál no MAPPF hodi partilla esperiénsia ba benefisiáriu sira, liga ba formasaun jenériku foku oinsá atu ebolora relatóriu administrasaun, relatóriu ba progresu no despeza.
Aleinde ne’e, formasaun espesifiku ligadu tipu atividade ne’ebé mak daudaun ne’e grupu alvu sira hala’o hanesan atividade ortikultura foku ba haki’ak modo, presiza kapasita oinsá bele hatene haki’ak fini, planta no kuidadu molok atu kolleta no atividade peska husik ikan , maibé presiza atu kuidadu.
Tuir dadus Ministériu Dezenvolvimentu Rurál no Abitasaun Komunitária destaka ona funsionáriu kontratadu na’in-25 atu sai fasilitadór komunitáriu ba grupu sira ne’ebé sira-nia atividade iha setór agrikultura.
Reprezentante Prezidente Autoridade Munisípiu Kovalima Filomeno Cardoso fó hanoin ba benefisiáriu ne’ebé estabelese ona grupu tuir formasaun ho sériu, nune’e bainhira implementa programa tuir matadalan ne’ebé mak define ona.
“Ita-boot sira tuir formasaun ida-ne’e ho sériu nune’e bele komprende bainhira fila hodi aplika tuir korridór no matadalan ne’ebé mak iha nune’e firmi ho komprometidu atu hadi’a povu no rai”, nia dehan.
Formasaun ida-ne’e parte ida atu kapasita iha área sira hanesan jenériku ho espesífiku signifika grupu agrikultór presiza komprende di’ak liu ba área agrikultura, oinsá bele kuda modo hodi fornese ba merkadu.
Iha atividade ida-ne’e benefisiáriu presiza atu kumpri lala’ok ne’ebé mak formadór sira hatudu ona, lala’ok sira oinsá atu haki’ak animál nune’e bele implememta programa ho susesu.
Jornalista: Celestina Teles
Editór: Rafael Ximenes de A. Belo
